प्रदेश मांय ई अंतर्राष्ट्रीय महिला दिवस रा सिलसिला मांय भांत-भांत रा कार्यक्रम राख्या जा रह्या है। जैसलमेर मांय आज राख्यी ज्या कार्यक्रम मांय महिलावां रो मान करी ज्यो। झुंझुनूं जिला रा पिलानी री सी.एस.आई.आर. सीरी मांय वॉकेथॉन, टेबिल टेनिस अर क्रिकेट समेत न्यारा-न्यारा खेलां री होड़ां राख्यी ज्यी। जोधपुर मांय न्यारा-न्यारा हलकां मांय बेहतरीन काम करण वाळी महिलावां रो काल महिला दिवस री पैली वाळी सांझ मान कर्यो जावेला। राजस्थान रोडवेज ई आठ मार्च ने महिलावां अर टाबरियां सारू मुफ्त सफ़र रो सुबीतो मुहैया करावेला। रोड़वेज़ रा प्रबन्ध निदेशक पुरुषोत्तम शर्मा बतायो के 8 मार्च ने महिलावां रोड़वेज री साधारण अर एक्सप्रेस बसां मांय प्रदेश री सीमा मांय मुफ्त यात्रा कर सकेला। विश्व महिला दिवस रे मौके महिलावां स्मारकां अर संग्रहालयां मांय ई मुफ़्त घूम सकेला।