चिकित्सा अर स्वास्थ्य विभाग मांय जीएनएम रा 2 हजार 338, एएनएम रा 3 हजार 58 अर सीएचओ रा 5 हजार 261 ओहदां माथे संविदा रा आधार ऊं भर्ती करी जा रही है। चिकित्सा अर स्वास्थ्य मंत्री गजेंद्र सिंह खींवसर मंगलवार ने विधानसभा मांय प्रश्नकाल रे दौरान पूछी ज्या पूरक सवालां रा जवाब मांय आ जाणकारी दीनी। वे कह्यो के राज्य सरकार संविदा माथे काम करण वाळां री नौकरी पक्की करण री प्रक्रिया माथे ई काम कर रही है। मंत्री बतायो के पैली संविदा कर्मचारियां री नौकरी पक्की करण सारू 15 साल री संविदा आधारित नौकरी रो प्रावधान हो जिण ने डेढ़ साल पैली ई नुवा नियम बणा र 9 साल कर दीरीजी ही। इण ऊं पैली विधायक डॉ. जसवंत यादव रा मूल सवाल रा लिखित जवाब मांय चिकित्सा अर स्वास्थ्य मंत्री कह्यो के एनएचएम रा तैत राजस्थान कॉन्ट्रेक्चूअल हायरिंग टू सिविल पोस्ट्स रूल्स 2022 रा 39 हजार 579 ओहदा मंजूरशुदा है।