76वों गणतंत्र दिवस रविवार ने देशभर मांय हरख उमाव रे साथे मनायो जावे। रविवार ई रे दिन साल 1950 मांय भारतीय संविधान लागू व्हीयो हो। ओ दिन संविधान मांय निहित मूल्यां रो पालन करण री याद दिरावे है, जिण ऊं सगळा सारू न्याय, समानता अर सन्मान तैय व्हे सके। नई दिल्ली मांय कर्तव्य-पथ माथे व्हीया राष्ट्रीय जळसा मांय राष्ट्रपति द्रौपदी मुर्मू राष्ट्रीय ध्वज फहरायो अर परेड री सलामी ली। इण ऊं पेला प्रधानमंत्री नरेन्द्र मोदी राष्ट्रीय समर स्मारक माथे शहीदां ने पुष्प अर्पण कर्या। गणतंत्र दिवस जळसा मांय इंडोनेशिया रा राष्ट्रपति प्रबोवो सुबिआंतो खास मेहमान रिया।
परेड मांय देश री सभ्यता, संस्कृति अर वैज्ञानिक प्रगति ने दरसावण वाळी झांकियां दरसायी ज्यी। आं मांय टी-90 टैंक, नाग मिसाइल प्रणाली, ब्रह्मोस, पिनाका रॉकेट सिस्टम, अग्निबाण रॉकेट लॉन्चर, आकाश शस्त्र प्रणाली अर हळका वाहन बजरंग ने दरसाई ज्या। स्वर्णिम भारत, विरासत अर विकास री थीम माथे परेड मांय झांकियां निकाळी ज्यी। जळसा मांय सेना रा तीन्यू अंगां रे साथे ई अर्द्ध सैनिक बलां, एनसीसी अर एनएसएस री टुकड़ियां ई मार्च पास्ट करयो।
ईं साल री परेड मांय सरपंच, हथकरघा अर हस्तशिल्प कारीगर, स्वयं-सहायता समूहां रा सदस्य, आशा अर आंगनबाड़ी कार्यकर्तावां ने सड़क बणावण ऊं जुड्या कामगारां समेत 10 हजार ठावा मेहमान न्यूती ज्या हा।
प्रधानमंत्री नरेंद्र मोदी दीतवार ने गणतंत्र दिवस परेड ने देश री विविधता मांय एकता रो जीवत प्रदर्शन बताया। श्री मोदी सोशल मीडिया पोस्ट मांय कयो के परेड मांय सांस्कृतिक विरासत अर सैन्य कौशल रो प्रदर्शन अर जीवत झांकियां राज्यां री खुशहाल परम्परावां री नुमाइंदगी करे है। प्रदेशभर मांय गणतंत्र दिवस रीत मुजब अर हरख अर उमाव रे साथे मनायो जावे। न्यारा-न्यारा जिला मांय प्रभारी मंत्री अर जिला कलेक्टरां राष्ट्र ध्वज फहरायो अर तिरंगा ने सलामी दी।
राज्य थर रो जळसो उदयपुर रा महाराणा भूपाल स्टेडियम मांय व्हीयो। जठे राज्यपाल हरिभाऊ बागडे राष्ट्र ध्वज फहरायो अर मार्च पास्ट री सलामी ली। ई मौके राज्यपाल कयो के राष्ट्र अर प्रदेश रा सम्पूरण विकास सारू हर नागरिक ने आपरी जिम्मेदारी समझणी चाहिजे। वणा नौजवानां ऊं आपणा राजस्थान ने अगाडी बणावण री अरज करी।
म्हारा खबरनवीस बतायो के जळसा मांय ठावा काम सारू 17 पुलिसकर्मियां ने सन्मानित करी ज्या। आं मांय अतिरिक्त पुलिस महानिदेशक सचिन मित्तल अर एस. सेंगाथीर ने राष्ट्रपति पुलिस पदक ऊं नवाजी ज्या। वठे ई 15 पुलिसकर्मियां ने पुलिस पदक दीरी ज्या।
कार्यक्रम मांय मुख्यमंत्री भजन लाल शर्मा, राज्य सरकार रा मंत्री, विधायक, प्रशासनिक अहलकार अर जान्या मान्या लोगां रे साथे आम लोग ई भेळा व्हीया।
राज्य रा सगळा जिलां मांय गणतंत्र दिवस जळसा रा जिला थर रा कार्यक्रम व्हीया। राजधानी जयपुर मांय उपमुख्यमंत्री दीया कुमारी चौगान स्टेडियम मांय ध्वजारोहण करने परेड री सलामी ली।
विधानसभा परिसर मांय व्हीया कार्यक्रम मांय विधानसभा अध्यक्ष वासुदेव देवनानी झण्डो फहरायो। ईं मौके वणा प्रदेशवासियां ने गणतंत्र दिवस री शुभकामनावां देवता संविधान री गरिमा अर आदर्श बणाया राखण माथे जोर दियो।

भारतीय जनता पार्टी प्रदेश दफ्तर मांय पार्टी रा प्रदेश अध्यक्ष मदन राठौड झंडो फहरायो। ईं मौके पैली री मुंख्यमंत्री वसुंधरा राजे ई मौजूद री। वठे ई विपख रा नेता टीकाराम जूली जयपुर री बड़ी चौपड़ माथे राष्ट्र ध्वज फहरायो।
उपमुख्यमंत्री डॉ. प्रेमचन्द्र बैरवा भरतपुर रा पुलिस परेड ग्राउंड मांय, गृह राज्यमंत्री जवाहर सिंह बेढम डीग मांय जिला थर रा जळसा मांय राष्ट्र ध्वज फहरार परेड री सलामी ली। ई मौके वीरांगनावां, शिक्षकां, सरकारी कार्मिकां अर स्वयं सेवकां ने वां रा ठावा योगदान सारू सन्मानित करी ज्या।
कोटा रा महाराव उम्मेद सिंह स्टेडियम मांय शिक्षा मंत्री मदन दिलावर बेहतर काम करण वाळा 94 नागरिकां रो सन्मान करयो। पाली रा बांगड स्टेडियम मांय व्हीया जिला थर रा जळसा मांय कैबिनेट मंत्री जोराराम कुमावत तिरंगो फहरायो अर परेड री सलामी ली। सीकर मांय नगरीय विकास मंत्री झाबर सिंह खर्रा ध्वज फहरायो।
सरहदी जिला जैसलमेर अर बाडमेर री बीएसएफ चौकियां माथे ई हरख-उमाव रे साथे राष्ट्र ध्वज फहरायी ज्यो।
जोधपुर श्री उम्मेद राजकीय स्टेडियम मांय संसदीय कार्यमंत्री जोगाराम पटेल अर चित्तौडगढ रा इंदिरा गांधी स्टेडियम मांय सहकारिता अर नागरिक उड्डन राज्यमंत्री गौतम कुमार दक झण्डो फहरायो अर मार्च पास्ट री सलामी ली। जयपुर मांय राजस्थान नेत्रहीन कल्याण संघ मांय ई गणतंत्र दिवस उमाव रे साथे मनायी ज्यो। इण मांय पढेसरां देशभक्ति रा गीत, भाषण अर कवितावां ऊं सब रो मन मोह लियो। ई मौके आचार्य विद्या सागर जी रा रचित महाकाव्य मूंक माटी रा ब्रेल संस्करण रो विमोचन ई करी ज्यो।