57वीं अन्तर रेलवे निशानेबाजी होड़ सोमवार ने जयपुर मांय सरु व्ही। उत्तर पश्चिम रेलवे री ओर ऊं राख्यी जा रही ईं होड़ रो उद्घाटन रेल अर खाद्य प्रसंस्करण उद्योग राज्य मंत्री रवनीत सिंह कीनो। ईं मौके मंत्री रवनीत सिंह खेलां अर खिलाड़ियां ने बधावो देवण सारु रेलवे री सराहवणा कीनी। 27 सितम्बर तांई चालण वाळी ईं होड़ मांय राष्ट्रीय अर अन्तर्राष्ट्रीय स्तर रा खिलाड़ी सिरकत कर रह्या हैं। पेरिस ओलम्पिक 2024 मांय कांसा रो तमगो जीतण वाळा स्वप्निल कुसाले अर चौथी ठोड़ हासिल करण वाळा अर्जुन बबूता सागे एशियाई खेलां अर राष्ट्रमण्डल खेलां मांय सिरकत करण वाळा खिलाड़ियां समेत करीब 120 खिलाड़ी ईं होड़ मांय सिरकत कर रह्या है। राज्य स्तर री स्कूली विद्यार्थियां री 68वीं हैंडबॉल होड़ सोमवार ने डूंगरपुर मांय पूरी व्हे ग्यी। लड़कियां रा वर्ग मांय टोंक अर लड़कां रा वर्ग मांय गंगानगर री टीम चैम्पियन बणी। होड़ रा समापन जळसा मांय डूंगरपुर रा विधायक गणेश घोगरा अर दूजा पावणा जीतण वाळी अर दूजा नम्बर माथे रेहवण वाळी टीमां ने ईनाम दीना। जिला स्तर री 68वीं सॉफ्टबॉल अर रग्बी होड़ सोमवार ने डीग मांय सरू व्ही। टूर्नामेंट मांय 8 टीमां रा 112 खिलाड़ी सिरकत कर रह्या है। सहारई री सरकारी स्कूल मांय तीरंदाजी, राइफल ऊं निशाणो लगावण अर साइकल चलावण री होड़ां सरू व्ही। चूरू ज़िला रा राजलदेसर मांय ज़िला स्तर री तीरंदाजी होड़ सरु व्ही। पांच दिन री ईं होड़ मांय जिला रा 85 ऊं बत्ता खिलाडी सिरकत कर रह्या है।