28वां राज्य स्तरीय भामाशाह सम्मान जळसो उदयपुर रा मोहन लाल सुखाडिया विश्वविद्यालय सभागार मांय राख्यो गयो। जळसा मांय 157 भामाशाहां ने सम्मानित कर्यो गयो। जळसा मांय बोलता थकां शिक्षा अर पंचायतीराज मंत्री मदन दिलावर कह्यो के राज्य सरकार प्रदेश मांय शैक्षणिक उन्नयन खातिर लगोतार प्रयासरत है। वणां कह्यो के भामाशाहां री कानी सूं दिया जा रह्या सहयोग सूं गुणवत्तायुक्त शिक्षा, स्कूलां मांय सुविधावां रो विस्तार हो रह्यो है। श्री दिलावर बतायो के इण बरस प्रदेश रा स्कूलां मांय 140 करोड़ रूप्या सूं बत्ती री रकम रो सहयोग भामाशाहां सूं मिल्यो है। इण मौके माथे जनजाति क्षेत्रीय विकास मंत्री बाबूलाल खराड़ी, सांसद चुन्नीलाल गरासिया, डॉ मन्नालाल रावत साथे केई जनप्रतिनिधि अर शिक्षा महकमा रा अहलकार मौजूद रिया। जळसा मांय विश्व रिकॉर्ड संस्था रा प्रतिनिधि शिक्षा मंत्री मदन दिलावर ने तीन विश्व रिकॉर्ड रा प्रमाण पत्र सोंप्या। ध्यानजोग है के मुख्यमंत्री वृक्षारोपण अभियान-एक पेड़ मां के नाम रे चालता प्रदेश रा स्कूलां मांय 6 करोड़ सूं बत्ती पौधा लगाया गया। वठीने एक दिन मांय लगे टगे ढाई करोड़ पौधां रो रोपण व्ह्यो हो।