12वांअंतर्राष्ट्रीय योग दिवस दीतवार ने मणायो जावेला। इण रो ई साल रो मुद्दो ‘‘स्वस्थ आयु के लिए योग’’ राख्यी ज्यो है। भारत सागे आखी दुनिया मांय योग दिवस मनावण रे दौरान परदेश मांय भारत रा 200 ऊँ बत्ता दूतावासां मांय ई योग सत्र राख्या जावेला। राष्ट्रीय स्तर रो कार्यक्रम प्रधानमंत्री नरेन्द्र मोदी री अगुवाई मांय कोलकाता मांय राख्यो जावेला।
ईं बीचे आयुष राज्य मंत्री प्रताप राव जाधव बतायो के सरकार काम री ठौड़ां माथे योग करण बाबत् थोड़ी देर री छुट्टी सारू वाई ब्रेक एप ई सरू करी ज्यी है। आयुष मंत्रालय री ओर ऊँ विकसित करी ज्या ईं मोबाइल एप्लीकेशन ऊँ काम बीचे पांच मिनट री छुट्टी ले र योग कर र लोग खुद ने तरोताजा अर तनाव मुक्त कर सके है। प्रदेश मांय ई सगळा जिलां, ब्लाॅक अर ग्राम पंचायतां, स्कूल-काॅलेजां अर आयुष्मान आरोग्य मंदिरां मांय योग कार्यक्रम राख्या जावेला। अंतर्राष्ट्रीय योग दिवस रे मौके राज्य स्तर रो जळसो सिरोही जिला रा आबूराज मांय राख्यो जावेला। मुख्यमंत्री भजनलाल शर्मा रो ई इण मांय शामिल व्हेवण रो कार्यक्रम है। केन्द्रीय मंत्री अश्विनी वैष्णव बीकानेर रा करणी सिंह स्टेडियम मांय राख्या जावण वाळा योग दिवस कार्यक्रम मांय शामिल व्हेला। आयुष मंत्रालय री ओर ऊँ राजधानी जयपुर रा जंतर-मंतर मांय भेळो योगाभ्यास कार्यक्रम राख्यो जावेला। ईं सागे ई एस.एम.एस. स्टेडियम, अल्बर्ट हॉल अर जलमहल समेत शहर री खास-खास ठौड़ां योगाभ्यास कार्यक्रम राख्या जावेला। ईं बीचे 13 मार्च ऊँ नई दिल्ली ऊँ सरू करी ज्या 100 दिन रा अंतर्राष्ट्रीय योग दिवस काउंट डाउन कार्यक्रम रा तैत आखा राज्य मांय योग जागरुकता कार्यक्रम राख्या जा रह्या है। थावर ने डीग अर जैसलमेर मांय योग जागरुकता रैली निकाळ र निरोगा रेहवण रो संदेश दियो ज्यो।