हॉकी रा जादूगर मेजर ध्यानचंद रा जन्म दिवस रे मौके 26 अगस्त ने सरू करी ज्यो खेल सप्ताह थावर ने पूरो व्हे ग्यो। सप्ताह रा तैत सवाईमाधोपुर रा जिला खेलकूद प्रशिक्षण केंद्र मांय थावर ने रुमाल झपट्टा अर बैडमिंटन रा मुकाबला राख्यी ज्या। भरतपुर रा रामेश्वरी देवी कन्या महाविद्यालय मांय ई भांत-भांत री दौड़ सागे सितोलिया ,कबड्डी, खो-खो, रस्साकसी, रुमाल झपट्टा अर चम्मच दौड़ री होड़ां राख्यी ज्यी। ईं दौरान फिट इंडिया री शपथ ई दिरायी ज्यी अर जीतण वाळी टाबरियां ने ईनाम दिया ज्या। झालावाड़ मांय वॉलीबॉल, बैडमिंटन, लंगड़ी टांग, टेबल टेनिस, फुटबॉल, रस्साकसी, हॉकी, खो-खो अर टेनिस बॉल क्रिकेट सरीखी होड़ां राख्यी ज्यी।