देशभक्ति रो जज़्बो बधावण सारू 15 अगस्त तांई चालण वाळा अभियान  रा तैत प्रधानमंत्री नरेन्द्र मोदी हर घर तिरंगा वेबसाइट माथे वां री सेल्फी साझा कर र आजादी रो जश्न मनावण री अपील कीनी। वे सोशल मीडिया हैंडल माथे वां री प्रोफ़ाइल फोटो री ठोड़ तिरंगो झंडो लगायो है अर लोगां ऊं ई वां री फोटो री ठोड़ तिरंगो झंडो लगावण री अपील कीनी।
प्रदेश मांय ई हर घर तिरंगा अभियान रा तैत न्यारा-न्यारा कार्यक्रम राख्या जा रह्या है। झुंझुनूं मांय हर घर तिरंगा अभियान रा तैत नगर परिषद रा अहलकार, कर्मचारी अर खुद सेवक समूहां री महिलावां हाथां मांय तिरंगो झंडो ले र नगर परिषद ऊं शहीद स्मारक तांई रैली निकाळी। पुलिसवाळा ई पुलिस लाईन ऊं शहीद स्मारक तांई तिरंगा रैली निकाळी। श्रीगंगानगर मांय सफाई कर्मचारी अर मनरेगा मजूरां ने शपथ दिरायी ज्यी अर घरां माथे तिरंगो झंडो फहरावण सारू जाग जगायी ज्यी। डूंगरपुर रा जिला कलेक्टर अंकित कुमार सिंह बतायो के जिला मांय तिरंगा यात्रा, तिरंगा रैली, तिरंगा दौड़ अर मैराथन, तिरंगा कॉन्सर्ट, तिरंगा कैनवास, तिरंगा प्लेज, तिरंगा सेल्फी, तिरंगा ट्रिब्यूट अर तिरंगा मेळा लगाया जावेला। हनुमानगढ़ मांय जिला प्रशासन री ओर ऊं सेल्फी होड़ राख्यी ज्यी है, जिण मांय तिरंगा सागे खुद री फोटो सोशल मीडिया हैंडल्स माथे अपलोड करणी व्हेला। सवाईमाधोपुर जिला मांय ई 13 ऊं 15 अगस्त तांई तिरंगा यात्रा, तिरंगा रैली अर तिरंगा दौड़ समेत न्यारा-न्यारा कार्यक्रम राख्या जावेला। भीलवाडा मांय ई 13 ऊं 15 अगस्त तांई ‘हर घर तिरंगा अभियान‘ रा तैत न्यारा-न्यारा कार्यक्रम राख्या जावेला।