स्वच्छता ही सेवा पखवाड़ा रा तैत थावर ने जयपुर मांय द्रव्यवती रिवर फ्रंट माथे साफ-सफाई रो अभियान चलायी ज्यो। ईं दौरान जयपुर ग्रेटर नगर निगम री महापौर सौम्या गुर्जर स्कूली बच्चां ने सफाई रो महत्व समझायो अर गीला अर सूखा कचरा रा बारा मायं जाणकारी दीनी। महापौर बच्चां सागे द्रव्यवती रिवर फ्रंट री सफाई कीनी। ईं मौके महापौर कह्यो के किण ई देश या शहर री साफ-सफाई ऊं पहचाण बणे है। वे सगळा ऊं जिम्मेदारी समझाता थकां आप-आप रा शहर, गांव, मोहल्ला अर गळी ने साफ राखण री अपील कीनी। बच्चा, संस्थावां रा नुमाइंदा अर जनता जयपुर को स्वच्छ बनाएंगे नारा सागे साफ-सफाई करता थकां द्रव्यवती रिवर फ्रंट ने साफ कर दीनो। स्वच्छता ही सेवा अभियान रा तहत आज जयपुर मांय नगर निगम हेरिटेज़ री ओर ऊं एक-दो-तीन-चार, प्लास्टिक का करो बहिष्कार नारा सागे सिंगल यूज प्लास्टिक री शव यात्रा निकाळी ज्यी। निगम आयुक्त अभिषेक सुराणा शव यात्रा ने रवाना कीनी। पाली जिला रा फालना रेलवे टेशन अर कॉलोनी परिसर मांय स्वच्छता ही सेवा अभियान रा तैत आज एक पेड़ मां के नाम दिवस मनायी ज्यो अर पौधा रोप्यी ज्या। स्वास्थ्य निरीक्षक मनोज कुमार मीणा रेलवे कर्मचारियां ने आं पौधां री सार-संभाळ करण री शपथ दिरायी।