स्वच्छता ही सेवा अभियान रा तैत अजमेर मांय सोमवार ने नगर निगम री ओर ऊं नगर निगम परिसर ऊं आगरा गेट सब्जी मंडी तांई स्वच्छता रैली निकाळी ज्यी। रैली मांय नगर निगम रा अहलकार, पार्षद, सफाई कर्मचारी, स्कूली विद्यार्थी अर जनता सिरकत कीनी। ईं मौके मौजूद लोगां ने साफ़-सफ़ाई राखण री शपथ दिरायी ज्यी। शाहपुरा रा राजकीय संस्कृत उच्च प्राथमिक विद्यालय रेगर बस्ती मांय साफ़- सफ़ाई अर ठोस अर तरल कचरा रा निपटारा रा बारा मांय जाणकारी दीरीजी। इंर् मौके विद्यार्थियां ने स्वच्छता ही सेवा री शपथ ई दिरायी ज्यी। चित्तौड़गढ मांय जिला कलक्टर आलोक रंजन री अगुवाई मांय सोमवार ने कलक्ट्रेट परिसर मांय करीब डोढ़ घंटा तांई साफ़-सफ़ाई करी ज्यी। भीलवाड़ा मांय गंदगी करण वाळां रा चालान कर र जुर्मानो वसूल कर्यो जा रह्यो है। सिरोही ज़िला रा राजकीय उच्च माध्यमिक विद्यालय परिसर उन्दरा मांय केंद्रीय संचार ब्यूरो, क्षेत्रीय कार्यालय सिरोही री ओर ऊं संगोष्ठी, शपथ अर श्रमदान रा कार्यक्रम राख्यी ज्या। कार्यक्रम रे दौरान स्वच्छता ही सेवा रा बारा मांय प्रश्नोत्तरी होड़ राख्यी ज्यी अर जीतण वाळां ने ईनाम दिया ज्या। सवाईमाधोपुर मांय नगर परिषद री ओर ऊं हम्मीर सर्किल ऊं सर्किट हाउस तांई स्वभाव स्वच्छता, संस्कार स्वच्छता थीम माथे स्वच्छता मैराथन दौड़ राख्यी ज्यी। मैराथन मांय विद्यार्थी अर जनता सिरकत कीनी। पाली मांय जवाई बांध हलका कने बस्योड़ा गांवां मांय साफ़-सफ़ाई करी ज्यी अर रेहड़ी-पटरी वाळां ने कचरो भेळा करण रा डिब्बा दिया ज्या अर साफ़-सफ़ाई राखण री शपथ दिरायी ज्यी। झालावाड़ मांय संवारे स्वभाव स्वच्छता – संस्कार स्वच्छता थीम माथे एक घंटा रो खास सजीव फोन इन कार्यक्रम प्रसारित करी ज्यो। नगर पालिका पिड़ावा री ओर ऊं स्वच्छता ब्रांड एंबेसडर कवि मनोज निडर रे मार्फत जनता ऊं साफ़-सफ़ाई राखण री अपील करी जा रही है अर न्यारी-न्यारी ठौड़ां साफ़-सफ़ाई पाछे चित्रकारी कर र सजावट करी जा रही है। भवानी मंडी रा मेला मैदान मांय ‘‘सफाई मित्र सुरक्षा शिविर‘‘ लगायी ज्यो जिण मांय सफाई कर्मचारियां अर नगर पालिका रा कर्मचारियां रा स्वास्थ्य री जांच करी ज्यी।