स्वच्छता ही सेवा अभियान रे तैत दीतवार ने प्रदेशभर मांय केई ठौड़ां स्वच्छता गतिविधियां राखी गयी। इणी कड़ी मांय जयपुर कलेक्ट्रेट परिसर मांय स्वच्छता कार्यक्रम रे तैत अधिकारी अर कर्मचारी श्रमदान कर्या। जैसलमेर मांय बस स्टेण्ड माथे नगर पालिका री कानी ऊं सफ़ाई अभियान चलाया गया। इणी भांत पाली मांय भी बांगड़ सफाखाना मांय लोग साफ़-सफाई कर स्वच्छता रो संदेश दिया। भीलवाड़ा मांय स्वच्छता पखवाडां रे तैत दीतवार ने केई सरकारी महकमां मांय साफ-सफाई करी गई। इण मौके अधिकारी अर कर्मचारीयां मांय स्वच्छता री कानी ऊं जाग जगायी गयी। नीमकाथाणा ज़िला मांय स्वच्छता ही सेवा अभियान रे तैत पुलिस अधीक्षक कार्यालय मांय पुलिसकर्मी साफ-सफ़ाई करी। वठिने ज़िला रा केई थाणा मांय भी साफ़-सफ़ाई सूं जुड़ी गतिविधियां करायी गयी। डूंगरपुर ज़िला मांय पुलिस अधीक्षक मोनिका सैन री अगुवाई मांय पुलिसकर्मी स्वच्छता अभियान चलाया अर केई ठौड़ां पौधा लगा र पर्यावरण ने बचावा रो संदेश दिया। भरतपुर कलेक्ट्रेट परिसर मांय दीतवार ने सुंवारे स्वच्छता अभियान चलायो गयो। कलेक्ट्रेट परिसर मांय अधिकारी अर कर्मचारी प्लास्टिक कचरा ने इकट्ठो कर नष्ट कर्या। इण मौके शहर मांय मोटरसाईकिल रैली मांय भी स्वच्छता रो संदेश दियो गयो।