‘‘स्वच्छता ही सेवा’’ अभियान रा तहत प्रदेश मांय न्यारा-न्यारा कार्यक्रम राख्या जा रह्या है। जयपुर मांय केन्द्रीय संचार ब्यूरो री ओर ऊं स्वच्छता ही सेवा अभियान- “स्वभाव स्वच्छता संस्कार स्वच्छता” रा तहत शुक्रवार ने सफ़ाई रा प्रति महात्मा गांधी री सोच ने समर्पित मोटा चित्र लगायी ज्या। केन्द्रीय संचार ब्यूरो अर पत्र सूचना कार्यालय री अपर महानिदेशक ऋतु शुक्ला बतायो के केन्द्रीय सदन रे बाहर अ फोटो लगावण रो मकसद साफ-सफ़ाई राखण मांय जनता री भागीदारी ने बधावो देवणो है। जयपुर रा केंद्रीय सदन मांय “स्वच्छता ही सेवा“ संदेश सागे खुद री फोटो खींचण री ठौड़ ई बणायी ज्यी है। पत्र सूचना कार्यालय जोधपुर री ओर ऊं वेबिनार राख्यी ज्यी। वेबिनार मांय फ्रंटियर मुख्यालय बीएसएफ, जोधपुर रा उपमहानिरीक्षक विदुर भारद्वाज अर पत्र सूचना कार्यालय अर केंद्रीय संचार ब्यूरो, राजस्थान रीजन री अपर महानिदेशक ऋतु शुक्ला ई सिरकत कीनी। श्रीगंगानगर मांय निबंध होड़ राख्यी ज्यी, जिण मांय राजकीय उच्च माध्यमिक बालिका विद्यालय मटका चौक अर गुरुनानक गर्ल्स सीनियर सेकेंडरी स्कूल री टाबरियां सिरकत कीनी। होड़ मांय जीतण वाळां रो गांधी जयंती रे मौके मान कर्यो जावेला। सवाईमाधोपुर ज़िला रा डेकवा गांव मांय केंद्रीय संचार ब्यूरो रा क्षेत्रीय कार्यालय री ओर ऊं पोषण-माह, स्वच्छता-ही-सेवा अर सम्पूर्णता-अभियान ऊं जुड्या कार्यक्रम राख्यी ज्या। पाली ज़िला रा रानी री सरकारी सीनियर सैकेण्डरी स्कूल ऊं मानव श्रृंखला बणा र अर शपथ ले र साफ सफाई रो संदेश दियो ज्यो। ज़िला रा बाली मांय विद्यार्थियां मांय साफ सफाई बाबत जाग जगायी ज्यी। झालावाड़ ज़िला रा झालरापाटन मांय सफाई मित्र सुरक्षा शिविर लगायी ज्यो। शिविर मांय सफाई मित्रां री स्वास्थ्य जांच करी ज्यी अर जरूरी राय अर दवाइयां दीरीजी। अकलेरा मांय मजूरां ने साफ-सफाई राखण री शपथ दिरायी ज्यी। कोटपूतली-बहरोड़ जिला मांय विराटनगर रा पावटा उपखंड मांय महिला अर बाल विकास विभाग री ओर ऊं पोषण मेळो लगायी ज्यो। कार्यक्रम मांय आंगनबाड़ी कार्यकर्तावां री ओर ऊं पोषक तत्व अर मोटा अनाज ऊं बण्या व्यंजनां रो दरसाव करी ज्यो अर आस वाळी लुगाइयां री गोद भराई रो कार्यक्रम राख्यी ज्यो। पाली जिला रा गिरादड़ा मांय पोषण माह रा तैत राख्यी ज्या कार्यक्रम मांय पोषण, साफ सफाई, टीका लगावण अर पोषाहार रा बारा मांय जाणकारी दीरीजी अर रंगोली सजायी ज्यी। सवाईमाधोपुर मांय आंगनबाड़ी केंद्रां माथे किचन गार्डन अर पोषण वाटिका रा आयोजन राख र महिलावां ने घर मांय फल-तरकारियां रा पौधा लगावण अर वां री सार-संभाळ रा बारा मांय जाणकारी दीरीजी। झुंझुनूं जिला रा बुहाना मांय महिला अर बाल विकास विभाग री ओर ऊं आस वाळी महिलावां री गोद भराई, बच्चां सारू अन्नप्राशन कार्यक्रम, बेटी जन्मोत्सव अर पोषक व्यंजन री प्रदर्शनी रा कार्यक्रम राख्यी ज्या। ईं मौके बेहतर काम करण वाळी पांच आंगनबाड़ी कार्यकर्तावां ने मान पाना दे र नवाज़ी ज्यी अर पी.एम.एम.वी.वाई रा तैत पात्र लोगां ने चैक दिया ज्या।