सिरोही जिला रा आबूराज रा ज्ञान सरोवर मांय विधि अर न्याय मंत्रालय री कानी सूं दो दिन रो रिफॉर्म्स उत्सव अर चिंतन शिविर दीतवार ने पूरो व्हीयो। समापन सत्र मांय सम्बोधित करता थकां केन्द्रीय कानून मंत्री अर्जुनराम मेघवाल कयो के ऐड़ा शिविर आत्म चिंतन अर व्यक्तित्व विकास रे माध्यम सूं कार्यकुशलता, सकारात्मक नेतृत्व क्षमता अर सेवा भाव ने नुवी ऊर्जा देवेला। वणां कयो के ए शिविर विकसित भारत रा संकल्प ने साकार करण मांय महती भूमिका निभाणे खातिर सगळा ने संकल्पित भी करेला। श्री मेघवाल कयो के शिविर मांय मंथन रे पाछे तियार कर्याे गयो घोषणा पत्र, देश मांय सुधार री रफ्तार ने तेज करेला।
चिंतन शिविर मांय देशभर सूं आया विधि विशेषज्ञां, न्यायिक अहलकारां अर मंत्रालय रा मोटा अहलकार न्यायिक सुधारां, तकनीक आधारित न्याय व्यवस्था, पारदर्शिता अर जनसुलभ न्याय जैड़ा मुद्दा माथे न्यारा-न्यारा सत्रां मांय चर्चा करी।