सिख पंथ रा दसवां गुरू अर खालसा पंथ चलावण वाळा गुरु गोबिंद सिंह रा प्रकाश परब रे मौके सोमवार ने प्रदेश मांय न्यारा-न्यारा कार्यक्रम राख्यी ज्या। गुरुद्वारां ने सोहवणी रोशनी ऊं सजायी ज्या है। राजधानी जयपुर मांय राजापार्क, हीदा की मोरी अर वैशाली नगर समेत न्यारा-न्यारा गुरूद्वारां मांय लंगर बरती ज्या अर गुरु गं्रथ साहिब रा अखंड पाठ, अरदास अर शबद कीर्तन रा कार्यक्रम राख्यी ज्या। झालावाड़ रा झालरापाटन मांय प्रभात फेरी निकाळी ज्यी अर अस्पतालां मांय फल बांटी ज्या। पाली जिला रा सुमेरपुर रा गुरूद्वारा मांय पौधा रोप्यी ज्या। भरतपुर रा गुरूद्वारा मांय गुरबाणी रा कार्यक्रम राख्यी ज्या अर पाईबाग गुरुद्वारा मांय रागी जत्था शबद कीर्तन कीनो। डीग रा गुरुद्वारां मांय फूलां ऊं सोहवणी सजावट सागे शबद कीर्तन रा कार्यक्रम राख्यी ज्या, प्रभात फेरी निकाळी ज्यी अर लंगर बरतायी ज्या। हनुमानगढ़ रा सुक्खा सिंह मेहताब सिंह गुरुद्वारा मांय संगत मत्थो टेक र देश मांय खुशहाली री कामना कीनी। म्हाणा श्रीगंगानगर खबरनवीस बतायो के ज़िला रा बूढा जोहड़ मांय खास दीवान सजायी ज्या है अर अटूट लंगर री व्यवस्था करी ज्यी है। राष्ट्रपति द्रौपदी मुर्मू अर प्रधानमंत्री नरेन्द्र मोदी जनता ने गुरु गोबिंद सिंह रा प्रकाश परब रे मौके शुभकामनावां दीनी है। राज्यपाल हरिभाऊ बागड़े अर मुख्यमंत्री भजनलाल शर्मा ई जनता ने बधाई दीनी।