सिख धर्म चलावण वाळा गुरु गोबिंद सिंह रा साहिबज़ादां रा बलिदान ने याद करता थकां गुरूवार ने वीर बाल दिवस मनायी ज्यो। ईं मौके नई दिल्ली मांय राख्यी ज्या खास कार्यक्रम मांय प्रधानमंत्री नरेन्द्र मोदी ई शिरकत कीनी। कार्यक्रम मांय मौजूद बच्चां ने सम्बोधित करता थकां श्री मोदी कह्यो के भारत रा लोकतंत्र री व्यापकता गुरूआं री सीख, साहिबज़ादां रा बलिदान अर देश रा एका रा मूल मंत्र माथे आधारित है। श्री मोदी कह्यो के बहादुर साहिबज़ादां री जिन्दगी ऊं देश री अखंडता अर विचारधारा सागे समझौतो नी करण री सीख मिले है। ईं मौके प्रधानमंत्री सुपोषित ग्राम पंचायत अभियान री सरूआत ई कीनी। ईं अभियान रो मकसद पोषण ऊं जुड़ी सेवावां ने जनता री भागीदारी रे जरिये मजबूती ऊं लागू कर र पोषण व्यवस्था ने मजबूत बणावणो है। कार्यक्रम मांय प्रधानमंत्री राष्ट्रीय बाल पुरस्कार ऊं नवाज़ी ज्या बच्चां सागे मोटी तादाद मांय बच्चा अर मान्योड़ा लोग शिरकत कीनी। साल 2022 मांय प्रधानमंत्री मोदी गुरू गोबिंद सिंह रा साहिबज़ादां ने श्रद्धांजलि देवण सारू वीर बाल दिवस मनावण रो ऐलाण कीनो हो। वीर बाल दिवस रे मौके प्रदेश मांय ई खास कार्यक्रम राख्यी ज्या। जयपुर मांय भारतीय जनता पार्टी रा प्रदेश मुख्यालय मांय राख्यी ज्या कार्यक्रम मांय शबद कीर्तन करी ज्यो। श्रीगंगानगर रा शहीद नगर गुरुद्वारा मांय साहिबजादां री याद मांय लंगर लगायी ज्यो। पाली मांय गुरुद्वारा ऊं सूरजपोल चौराहा तांई शहीदां रा मान मांय रैली निकाळी ज्यी। जैसलमेर मांय गुरुबाणी रो पाठ करी ज्यो। सवाईमाधोपुर मांय ई खास कार्यक्रम राख्यी ज्यो। केंद्रीय संचार ब्यूरो रा सिरोही क्षेत्रीय कार्यालय री ओर ऊं सिरोही ज़िला री मांडवा आई.टी.आई. मांय खास कार्यक्रम राख्यी ज्यो ।