सावण रा पहला सोमवार रे मौके आज पूरा राज्य मांय भांत-भांत रा कार्यक्रम राख्यी ज्या। शिवालयां मांय तड़के पट खुलता ईं अभिषेक रो सिलसिलो सरू व्हे ग्यो अर हर-हर महादेव रा जयकारा गंजू उठ्या।  जयपुर रा ताड़केश्वर महादेव मिंदर मांय उज्जैन रा महाकाल मिंदर री भांत भस्म आरती व्ही। उदयपुर रा नीलकंठ महादेव मिंदर मांय ई मोटी तादाद मांय जातरु पूग रह्या है। कावड़ यात्रावां अर भक्तां री मोटी तादाद ने ध्यान राखता थकां प्रशासन री ओर ऊं हिफ़ाज़त रा खास इंतजामात् करी ज्या है। ड्रोन अर सी.सी.टी.वी. कैमरां रे ज़रिए निगराणी राख्यी जा रही है। भरतपुर मांय नाग पंचमी रे मौके किला रा बांके बिहारी परिक्रमा गेला मांय जातरू नाग देवता री पूजा-अर्चना कर र खुशहाली अर बरकत री कामना कीनी। सवाईमाधोपुर ज़िला मांय शिवाड़ रा घुश्मेश्वर महादेव अर भगवतगढ़ रा अरणेश्वर महादेव समेत न्यारा-न्यारा शिव मिन्दरां मांय भक्त जल, दूध, दही अर पंचामृत ऊं शिवलिंग रो अभिषेक कर र पूजा -अर्चना कीनी। कावड़िया ई पवित्र सरोवरां ऊं जल ला र भोलेनाथ रो अभिषेक कीनो। सवाईमाधोपुर रा जूना शहर मांय कावड़ यात्रा निकाळी ज्यी। वठै सिंज्यां री पोर भजन संध्या रो ई कार्यक्रम है। हनुमानगढ़ रा शिव मिन्दरां मांय ई जातरू भगवान शिव रे दूध, जल अर बेल रा पत्ता चढ़ा र सुख-समृद्धि री कामना कर रह्या है। झुंझुनूं मांय ए.डी.एम. डॉ. अजय आर्य बतायो के देवस्थान विभाग री ओर ऊं लावरेश्वर महादेव मिन्दर मांय संवारे 9 ऊं 10 बजां तांई रुद्राभिषेक महोत्सव राख्यी ज्यो। बाड़मेर ज़िला रा न्यारा-न्यारा शिव मिन्दरां मांय ई मोटी तादाद मांय जातरु भगवान शिव री पूजा-अर्चना कर रह्या है।