सावण ऊं व्हे रही चोखी बिरखा ऊं प्रदेश मांय बारिश री कमी रो आंकड़ो घट र सामान्य ऊं 9 फीसदी कम रह ग्यो है। जल संसाधन विभाग रे मुजब हाल तांई बाड़मेर अर बीकानेर समेत सात ज़िलां मांय घणी जोरदार बिरखा व्ही है। अजमेर, चूरू, भीलवाड़ा, भरतपुर अर जयपुर समेत 21 ज़िलां मांय सामान्य अर 13 जिलां मांय सामान्य ऊं कम पाणी बरस्यो है। प्रदेश रा 693 छोटा-मोटा बंधां मांय ऊं आधा ऊं बत्ता मांय पाणी आ रह्यो है। 25 बंधा लबालब भर ग्या है। ईं बीचे बुधवार ने ई चित्तौड़गढ़, झालावाड़, बारां अर भीलवाड़ा मांय झमाझम बिरखा व्ही। चित्तौड़गढ़ जिला रा बस्सी मांय 22 सेंटीमीटर पाणी बरस्यो। ज़िला रा बेगंू, गंगरार, निम्बाहेड़ा, डूंगला, भदेसर अर रावतभाटा मांय ई चोखो मेह बरस्यो। रावतभाटा हलका रो खोकी बंधो पाणी री तेज़ आमद रे कारण टूट ग्यो, जिण ऊं केई हलकां मांय पाणी भर ग्यो। मौसम महकमो काल 26 ज़िलां सारू बारिश रो येलो अलर्ट जारी कीनो है। गुरूवार ने घणखर ठौड़ां मझला अर कठे-कठे तेज़ दर्जा बिरखा रा आसार है। रिमझिम बारिश रा दौर बीचे आज हरियाली अमावस मनायी ज्यी। ईं मौके सैर-सपाटा री न्यारी-न्यारी ठौड़ां लोग परिवार समेत गोठ मनाता निज़र आया।