राज्यपाल हरिभाऊ बागड़े टीबी मुक्त राजस्थान सारू पंचायतवार असरदार निगराणी कर्या जावण सारू निर्देश दिया है। श्री बागड़े सोमवार ने लोकभवन मांय राष्ट्रीय क्षय उन्मूलन री प्रगति री समीक्षा कर रिया हा। वणा गांवा ने टीबी मुक्त करण सारू ग्राम सेवकां री जवाबदेही माथे जोर दियो। राज्यपाल कयो के टीबी रा आंकड़ां मांय नी बल्कि व्यवहार मांय हर एक मरीज माथे ध्यान देवण री जरूरत है, जिण ऊं टीबी रो पूरी तरह खातमो कर्यो जा सके। राज्यपाल टीबी रोगियां ने नि-क्षय मित्र किट ई बांट्या। ई मौके चिकित्सा अर स्वास्थ्य मंत्री गजेन्द्र सिंह खींवसर कयो के राज्य ने साल 2030 तांई पूरी तरह टीबी मुक्त कर दिया जाएला। वणा बतायो के राजस्थान मांय अभियान रो 90 फीसदी लगस पूरो कर लीरी ज्यो है। बत्ती जोखिम वाळा 11 हजार ऊं बत्ती गांवां रो सर्वे करी ज्यो है। इण मांय ऊं 9 हजार ऊं बत्ती गांवां मांय खास शिविर लगा र टीबी मुक्त राजस्थान सारू कार्यवाही करीजी है। श्री खींवसर बतायो के राजस्थान मांय देश मांय सब ऊं बत्ती एक्स-रे स्क्रीनिंग करीजी है। राज्य रा एनएचएम निदेशक जोगाराम बतायो के शहरी स्थानीय निकायां मांय टीबी मुक्त वाॅर्ड अभियान चालू करयो जाएला।