सशस्त्र सेना झण्डा दिवस थावर ने मनायो जावेला। राज्यपाल हरिभाऊ बागड़े इण ऊं एक दिन पैली शुक्रवार ने देश सारू सब-कुछ बलिदान कर देवण वाळां ने याद कीना। ईं सिलसिला मांय सैनिक कल्याण विभाग रा निदेशक ब्रिगेडियर वीरेंद्र सिंह राठौड़ राज्यपाल रे प्रतीक रूप मांय बैज लगायो। ईं मौके राज्यपाल कह्यो के सशस्त्र सेना झण्डा दिवस शहीदां अर वां रा पिरवार वाळां रा प्रति कृतज्ञता जतावण रो मौको है। राज्यपाल ईं दौरान पैली वाळा फौजियां सारू वां री ओर ऊं मदद री रकम दीनी। मुख्यमंत्री भजनलाल शर्मा ई सशस्त्र सेना झण्डा दिवस री शुभकामनावां दीनी है। वे कह्यो के ओ दिन वां जांबाज़ फौजियां रा प्रति एकजुटता बतावण रो दिन है, जो देश सारू सब कुछ निछावर कर दीनो। सैनिक कल्याण विभाग रा निदेशक मुख्यमंत्री ने झण्डा रो बैज ई लगायो। सशस्त्र सेना झंडा दिवस रा सिलसिला मांय शुक्रवार ने बाड़मेर मांय एनसीसी कैडेट्स साइकिल रैली निकाळी। नीम का थाना तहसील हलका मांय एनसीसी केटेड्स जन जागरूकता रैली निकाळी। सशस्त्र सेना झण्डा दिवस रे मौके काल पूरा राज्य मांय कार्यक्रम राख्या जावेला। जयपुर मांय सैनिक कल्याण विभाग री ओर ऊं अल्बर्ट हॉल ऊं जनपथ तांई “विंटेज जीप रैली’ राख्यी जावेला।