संसद रा दोन्यू सदनां री कार्यवाही विपख रा हंगामा रे कारण रोकी ज्यी री। विपख रा दलां नीट मुद्दा माथे पढेसरां रा विरोध प्रदर्शन रे दौरान पुलिस री कथित कार्रवाई समेत कई मुद्दां माथे शोर-शराबो कर्यो। राज्यसभा रा सभापति सी.पी. राधाकृष्णन विपख रा हंगामा रे बीचे शून्यकाल सरू कर्यो। विपख रा नेता मल्लिकार्जुन खरगे अयोध्या राम मिन्दर ऊं कथित चढावा चोरी रो मुद्दो उठायो। संसदीय कार्य मंत्री किरेन रिजिजू कयो के अयोध्या मांय राम मिन्दर री खिलाफत करण वाळी कांग्रेस अर समाजवादी पार्टी अबे चंदा री कथित चोरी ने लेर नाटक करने जनता ने गुमराह करण री कोशिश कर री है। लोकसभा मांय ई हंगामा री हालात देखण ने मिली। संवारा सदन री कार्यवाही सरू होवण माथे अध्यक्ष ओम बिरला प्रश्नकाल सरू करण री कोशिश करी, पण विपख रा सदस्यां पढेसरां रा विरोध प्रदर्शन रे दौरान पुलिस री कथित कार्रवाई रो मुद्दो उठा दियो। विपख रा सदस्य ई मुद्दा माथे गृह मंत्री अमित शाह रा बयान री मांग कर रिया हा। श्री बिरला सगळा सदस्यां ऊं सदन ने सुचारू चलावण मांय मदद करण री अरज करी। वित्त मंत्री निर्मला सीतारमन मंगलवार ने लोकसभा मांय कराधान अर दूजा कानून संशोधन विधेयक, 2026 पेश कर्या। इण मांय टैक्स, डिजिटल भुगतान अर निपटान प्रणाली रा नियमां ने सरल बणावण रो प्रस्ताव है।