संविधान स्वीकार करण री मंगलवार ने 75वीं वर्षगांठ मनायी ज्यी । ईं मौके सरकार एक साल तांई चालण वाळा जळसा री सरूआत कीनी। अ समारोह 26 नवम्बर, 2025 तांई देशभर मांय राख्या जावेला। संविधान सभा 26 नवम्बर, 1949 ने संविधान अंगीकार कीनो हो जो 26 जनवरी 1950 ने लागू करी ज्यो। संविधान दिवस रे मौके मंगलवार ने नई दिल्ली मांय संविधान सदन रा केन्द्रीय कक्ष मांय खास कार्यक्रम राख्यी ज्यो जिण ने राष्ट्रपति द्रौपदी मुर्मू सम्बोधित कीना। ई मौके वे साल 2047 तांई विकसित भारत बणावण रो लक्ष्य हासिल करण सारू जनता ऊं व्यवहार मांय संवैधानिक आदर्शां ने अपणावण बाबत् कह्यो। राष्ट्रपति भारत रा संविधान ने जीवित अर प्रगतिशील दस्तावेज बताता थकां कह्यो के इंर् रे जरिये देश सामाजिक न्याय अर समावेशी विकास रा लक्ष्य हासिल कीना है। राष्ट्रपति लोकसभा अर राज्यां री विधानसभावां मांय महिलावां सारू आरक्षण ऊं जुड़्यो नारी शक्ति वंदन कानून बणावण री ई सराहवणा करता थकां कह्यो के ईं कानून ऊं महिलावां ने मजबूत बणावण रो नुवो जमानो सरू व्ह्यो है। राष्ट्रपति कह्यो के संविधान री प्रस्तावना मांय माण्ड्योड़ा न्याय, स्वतंत्रता, समानता अर बंधुत्व रा आदर्श देश रा सगळा रहवासियां ने फलबा-फूलबा अर समाज मांय एक-दूजा री देखरेख करण रो मौको देवे है। ईं मौके उप-राष्ट्रपति जगदीप धनखड़ कह्यो के ओ खास दिन देश रा संविधान ने स्वीकार करण रा 75 साल ने मनावण रा रूप मांय ऐतिहासिक पड़ाव ने बतावे है। ईं मौके लोकसभा अध्यक्ष ओम बिरला सगळा सांसदां ऊं संविधान स्वीकार करण रा 75 वां साल ने आप-आप रा चुणाव हलका मांय लोगां बीचे मनावण री अपील कीनी। वे सांसदां ऊं संविधान सभा कानी ऊं तैय मर्यादा मांय रह र चर्चा करण बाबत् ई कह्यो। कार्यक्रम रे दौरान राष्ट्रपति देश रो संविधान स्वीकार करण री 75वीं वर्षगांठ ने समर्पित यादगार सिक्को अर डाक टिकट जारी कीनो। कार्यक्रम मांय दो पोथियां- मेकिंग ऑफ द काँस्टीट्यूशन ऑफ इंडियाः ए ग्ल्म्पिस’’ और ’’मेकिंग ऑफ द काँस्टीट्यूशन ऑफ इंडिया एण्ड इट्स ग्लोरियस जर्नी रो विमोचन ई करी ज्यो। इंर् सागे ई संविधान रो संस्कृत अर मैथिली भाषावां मांय अनुवाद ई जारी करी ज्यो। कार्यक्रम मांय प्रधानमंत्री नरेन्द्र मोदी, केई केंद्रीय मंत्री, लोकसभा अर राज्यसभा मांय विपख रा नेता, सांसद अर मान्योड़ा लोग सिरकत कीनी। प्रधानमंत्री नरेन्द्र मोदी संविधान री 75वीं वर्षगांठ रे मौके जनता ने शुभकामनावां दीनी है। वे सोशल मीडिया प्लेटफॉर्म रे जरिये कह्यो के संविधान देश ने रस्तो बतावण वाळो है। प्रधानमंत्री कह्यो के संविधान देश री हजारां सालां री परंपरा री आधुनिक अभिव्यक्ति है। प्रदेश मांय ई संविधान दिवस रे मौके मंगलवार न्यारा-न्यारा कार्यक्रम राख्यी ज्या। जयपुर मांय राख्यी ज्या कार्यक्रम मांय मुख्यमंत्री भजन लाल शर्मा कह्यो के संविधान ऊं देश री जनता ने मजबूती मिली है। वे कह्यो के संविधान मांय बतायी ज्या कर्तव्यां री पालना रा बारा मांय जाग जगावण रा मकसद ऊं प्रदेश मांय न्यारा-न्यारा कार्यक्रम राख्या जा रह्या है। संविधान दिवस रे मौके विधानसभा अध्यक्ष वासुदेव देवनानी विधानसभा भवन रा राजनैतिक आख्यान संग्रहालय मांय नुवी बणायी ज्यी संविधान दीर्घा जनता ने सूंपी। इण मांय मूल संविधान रा बाईस हिस्सां री सरुआत मांय बतायी ज्यी कलाकृतियां रो दरसाव करी ज्यो है। ईं मौके देवनानी कह्यो के संविधान दीर्घा रो मकसद आमजन अर नौजवानां मांय देश अर इण रा संविधान रो बोध करावण सागे ही संविधान अर नैतिकता रा प्रति जाग जगावणो है। वे संविधान दिवस ने संविधान बणावण वाळां रा प्रति सिरधाभाव जताता थकां वां रा योगदान रा प्रति कृतज्ञता जतावण रो स्मरण दिवस बतायो। विधानसभा मांय पहली दफ़ा राख्यी ज्या ईं जळसा मांय मोटी तादाद मांय वकील, कानून री भणाई करण वाळा विद्यार्थी, मान्योड़ा लोग अर विधानसभा रा अहलकार अर कर्मचारी सिरकत कीनी। जळसा मांय संसदीय कार्य अर विधि मंत्री जोगाराम पटेल अर विपख रा नेता टीकाराम जूली ई मौजूद रह्या। जयपुर मांय चित्रकूट स्टेडियम ऊं पदयात्रा निकाळी ज्यी, जिण मांय युवा मामलात् अर खेल मंत्री कर्नल राज्यवर्धन राठौड़ समेत मोटी तादाद मांय नौजवान अर जनता सिरकत कीनी। दौसा मांय सूचना अर जनसंपर्क विभाग री ओर ऊं फोटो प्रदर्शनी अर संगोष्ठी राख्यी ज्यी। पाली मांय सूचना अर जनसंपर्क विभाग री ओर ऊं प्रदर्शनी लगायी ज्यी। श्रीगंगानगर अर बारां मांय प्रदर्शनी अर संगोष्ठी सागे सवाल-जवाब री होड़ां राख्यी ज्यी। अजमेर मांय युवा कार्यक्रम अर खेल मंत्रालय री ओर ऊं मैराथन दौड़ राख्यी ज्यी। चूरू मांय संविधान ऊं जुड़ी प्रदर्शनी लगायी ज्यी। टोंक मांय ई न्यारा-न्यारा कार्यक्रम राख्यी ज्या। कोटा मांय ई प्रदर्शनी लगायी ज्यी अर संगोष्ठी राख्यी ज्यी। ईं मौके अतिरिक्त जिला कलेक्टर श्रीमती कृष्णा शुक्ला संविधान ने देश री आत्मा बतायो। हनुमानगढ़ जंक्शन रा सूचना एवं जनसंपर्क कार्यालय मांय कार्यशाला राख्यी ज्यी अर चित्र प्रदर्शनी लगायी ज्यी। ईं मौके पाली रा राजकीय कन्या महाविद्यालय मांय राष्ट्रीय सेवा योजना रा तैत लगायी ज्या शिविर मांय संविधान दिवस अर नशा मुक्ति अभियान ऊं जुड़ी कार्यशाला राख्यी ज्यी। सिरोही जिला री स्कूलां, कॉलेजां अर दूजी ठौड़ां न्यारी-न्यारी होड़ां अर जागरूकता कार्यक्रम राख्यी ज्या। भरतपुर मांय चार दिन री फोटो प्रदर्शनी लगायी ज्यी है। सांचौर, बांसवाड़ा अर बाड़मेर ऊं ईं संविधान दिवस रे मौके न्यारा-न्यारा कार्यक्रम राख्या जावण रा समाचार मिल्या है।