प्रधानमंत्री नरेन्द्र मोदी देश रा अन्तरिक्ष रा हलका मांय कर्या गया कामां री सराहवणा करी। वे भारतीय वैज्ञानिकां री स्पेस डॉकिंग प्रक्रिया ने ऐतिहासिक बताया। प्रधानमंत्री कह्या के दूरदर्शी वैज्ञानिकां री बदौलत भारत अंतरिक्ष प्रौद्योगिकी रा हलका मांय नुवां मानदंड थापित कर रह्यो है, जिण सूं भावी चुनौतियां रो सामनो करबा मांय इमदाद मिलेला। श्री मोदी दीतवार ने आकाशवाणी सूं मन की बात कार्यक्रम मांय आप रा विचार साझा कर रह्या हा। वे कह्या के भारत आज आधुनिक स्पेस टेक्नोलॉजी मांय सब ऊं आगे है।
प्रधानमंत्री स्टार्टअप्स रो जिक्र करता थकां कह्या के आज देश रा छोटे शहर भी स्टार्टअप रो केन्द्र बण रह्या है। श्री मोदी कह्या के या गर्व री बात है के ई मांय सूं आधा सूं बत्ता स्टार्टअप बेटियां कानी ऊं कर्या जा रह्या है।
ई बरस रा पैला मन की बात कार्यक्रम ने सम्बोधित करता थकां प्रधानमंत्री सगळा ने सामुहिक इच्छाशक्ति रे सागे देश रा विकास मांय भागीदारी निभाबा ने कह्या। वे कह्या के लारला दशक मांय देश रो लोकतंत्र मजबूत व्ह्यो है। ई रे सागे ई प्रधानमंत्री कह्या के कुम्भ री विविधता एकता रो उत्सव है, अठे पूरी दुनिया सूं लोग आवे है। ई मांय मोट्यारा री भागीदारी बत्ता रूप ऊं निजर आवे है। श्री मोदी देशवासियां ने गणतंत्र दिवस री शुभकामनावां भी दी। वे कह्या के इण बरस भारतीय गणतंत्र री 75वीं वर्षगांठ है इण खातर ईं गणतंत्र दिवस रो खास महत्व है।

मुख्यमंत्री भजनलाल शर्मा आज प्रयागराज मांय राजस्थान मण्डप मांय मन की बात कार्यक्रम ने सुण्या। प्रदेशभर मांय मन की बात कार्यक्रम कई ठौड़ां माथे सामुहिक रूप ऊं सुण्यो ग्यो। केन्द्रीय कृषि राज्यमंत्री भागीरथ चौधरी ई ने कार्यकर्तावां रे सागे अजमेर मांय सुण्या। वठिने भाजपा कार्यालय मांय पार्टी पदाधिकारी अर कार्यकर्ता यो कार्यक्रम सुण्या।