शुक्रवार ने अंतर्राष्ट्रीय नशा मुक्ति दिवस मनायी ज्यो। युवावां अर नुवी पीढ़ी मांय नशा अर मादक पदार्थां रे बढ़ता इस्तेमाल ने रोकणे अर वां ने जागरुक करणे खातर ओ दिन मनायो जावे है। इण मौके माथे देश-प्रदेश मांय न्यारी-न्यारी गतिविधियां राख्यी ज्यी। नई दिल्ली मांय नार्काे को-ऑर्डिनेशन सेंटर री मीटिंग मांय गृह मंत्री अमित शाह नशे रे खिलाफ एकजुट व्हेर युद्ध छेड़णे रो हेलो कर्यो।
वणा कयो कि मादक पदार्थां रो ओ कारोबार देश री सुरक्षा, सामाजिक व्यवस्था, आर्थिक हितां अर युवावां रे भविष्य खातिर मोटो खतरो है। श्री शर्मा आध्यात्मिक नेतावां, युवावां अर मातावां सूं इण अभियान मांय मिल र भाग लेबा री अरज करी है। इण मौके माथे श्री शाह कयो के वां री सरकार रे कार्यकाल रे चालता 1 करोड़ 18 लाख किलो सूं बत्ती नशीला पदार्थां ने जब्त करयो गयो है। वणा कयो कि ओ आंकड़ों नशीला पदार्थां री तस्करी रे खिलाफ सरकार री लगोतार कार्रवाई ने दरसावे है।
अंतर्राष्ट्रीय नशा मुक्ति दिवस माथे प्रदेश मांय न्यारी-न्यारी जगावां माथे कार्यक्रम राख्या गया। डीग मांय जिला कलेक्टर राजकुमार कस्वां री अध्यक्षता मांय कार्यक्रम राख्यो। इण मांय लोगां ने नशा मुक्त भारत अभियान री जाणकारी दी। नागौर मांय साइकिल रैली निकाळ र नशो नी करणे रो संदेश दियो। जैसलमेर मांय भी माय भारत रा स्वयं सेवकां नशा रे दुष्प्रभावां रा बारा मांय जाणकारी दी। पाली रा बाली मांय प्रजापिता ब्रह्माकुमारी ईश्वरीय विश्वविद्यालय री कानी सूं कार्यक्रम राख्या गया। इण रे चालता समाज ने नशे रे नुकसान सूं जागरुक करयो गयो अर नशामुक्त भारत रे निर्माण मांय सहयोग करणे रो संदेश दियो गयो।