पैली वाळा राष्ट्रपति डॉ. सर्वपल्ली राधाकृष्णन ने आज वां रा जन्मदिन रे मौके सिरधा भाव सागे याद कर्या जा रह्या है। वां रो जन्मदिन शिक्षक दिवस रा तौर ऊं मनायो जावे है। ईं मौके राष्ट्रपति द्रौपदी मुर्मू बेहतरीन काम करण वाळा 82 शिक्षकां रो नई दिल्ली मांय राख्यी ज्या खास कार्यक्रम मांय मान कीनो। आं मांय प्रदेश रा ई दो अध्यापक श्रीगंगानगर ज़िला मांय पदमपुर रा बलजिन्दर सिंह बराड़ अर बीकानेर रा हुकम चंद चौधरी शामिल है। बलजिन्दर सिंह कबाड़ ऊं जुगाड़ रे जरिये विद्यार्थियां ने न्यारी-न्यारी सीख दीनी। ईं मौके राष्ट्रपति कह्यो के विद्यार्थियां रा बेहतर प्रदर्शन मांय शिक्षकां री महती भूमिका व्हे है। प्रधानमंत्री नरेन्द्र मोदी ई देश भर रा शिक्षकां ने शुभकामनावां दीनी है। सोशल मीडिया पोस्ट रे जरिए वे कह्यो के नौजवानां रा विचारां ने दिशा देवण मांय शिक्षकां रा काम रा प्रति आभार जतावण रो मौको है। राज्य मांय ई शिक्षक दिवस रे मौके न्यारा-न्यारा कार्यक्रम राख्यी ज्या। राज्य स्तर रो जळसो जयपुर मांय राख्यी ज्यो जठे मुख्यमंत्री भजनलाल शर्मा बेहतरीन काम करण वाळा शिक्षकां रो मान कीनो। ईं मौके वे कह्यो है के महंगा साज-ओ-सामान अर सुबीतां ऊं चोखी स्कूलां नी बणे है बल्कि शिक्षकां री निष्ठा अर समर्पण ऊं बणे है। वे आज जयपुर मांय राख्यी ज्या शिक्षकां रा राज्य स्तर रा मान जळसा मांय बोल रह्या हा। मुख्यमंत्री महिला शिक्षकां रा काम री सराहवणा करता थकां कह्यो के देश बणावण मांय महिलावां रो मोटो योगदान है। वे कह्यो के सरकार शिक्षा ने बधावो देवण सारू लगातार जतन कर रही है। कार्यक्रम मांय मुख्यमंत्री विद्यार्थियां ने टेबलेट ई दीना। राज्यपाल हरिभाऊ किशनराव बागड़े ई किशनगढ़ रा राजस्थान केन्द्रीय विश्वविद्यालय मांय राख्यी ज्या कार्यक्रम मांय शिक्षकां रो मान कीनो। वे कह्यो के शिक्षक विद्यार्थी री जिन्दगी बणावण सागे वां ने चोखा संस्कार दे र बेहतर इंसान बणावे है। राज्यपाल कह्यो के आला दर्जा री भणाई मांय गुणवत्ता माथे खास ध्यान दियो जावणो चाहिजे। राज्यपाल केंद्रीय विश्वविद्यालय मांय सूरज री रोशनी ऊं 700 किलोवाट बिजली बणावण री परियोजना ई जनता ने सूंपी। अलवर रा गोरी देवी कॉलेज मांय वन अर पर्यावरण मंत्री संजय शर्मा डॉक्टर सर्वपल्ली राधाकृष्णन री मूरत रो अनावरण कीनो। सवाईमाधोपुर मांय राख्यी ज्या कार्यक्रम मांय शिक्षकां अर भामाशाहां रो मान करी ज्यो। सांचौर रा सरकारी कॉलेज मांय भारत में गुरु – शिष्य परंपरा : अतीत, वर्तमान एवं भविष्य“ मुद्दा माथे अर चितलवाना रा कॉलेज मांय शिक्षक शिक्षा व समाज मुद्दा माथे संगोष्ठी राख्यी ज्यी। सिरोही, टोंक, हनुमानगढ़, गंगानगर, बांसवाड़ा, बाड़मेर, केकड़ी, करौली समेत न्यारा-न्यारा ज़िलां ऊं शिक्षक दिवस रे मौके शिक्षकां रा मान मांय जळसा राख्या जावण रा समाचार मिल्या है। शिक्षक दिवस रे मौके प्रदेशभर मांय 55 हजार 800 होशियार विद्यार्थियां ने टैबलेट दिया ज्या।