शिक्षक दिवस रे मौके काल राष्ट्रपति द्रौपदी मुर्मू देश रा 82 शिक्षकां रो राष्ट्रीय शिक्षक पुरस्कार दे र मान करेला। आं मांय श्रीगंगानगर रा डॉ. बलजिंदर सिंह बराड़ अर बीकानेर रा हुकम चंद चौधरी ई शामिल है। प्रदेश मांय ई शिक्षकां रा मान मांय न्यारा-न्यारा कार्यक्रम राख्या जावेला। जयपुर मांय राख्या जावण वाळा राज्य स्तर रा मान जळसा मांय मुख्यमंत्री भजन लाल शर्मा खास पावणा रा तौर ऊं सिरकत करेला। शिक्षा मंत्री मदन दिलावर री सदारत मांय व्हेवण वाळा ईं जळसा मांय चुणी ज्या शिक्षकां रो मान कर्यो जावेला अर विद्यार्थियां ने टेबलेट दिया जावेला। राज्यपाल हरिभाऊ किशनराव बागडे़ पैली वाळा राष्ट्रपति अर महान शिक्षक अर विचारक डॉ. सर्वपल्ली राधाकृष्णन ने याद करता थकां कह्यो के शिक्षक शिक्षा देवण सागे विद्यार्थी रो जीवन गढे है। वे शिक्षकां ऊं विद्यार्थियां रो दिमागी बूतो बधावण, चरित्र बणावण अर देश भक्ति रा संस्कार वाळी सीख देवण री अपील कीनी। मुख्यमंत्री भजनलाल शर्मा ई शिक्षक दिवस रे मौके शिक्षकां ने शुभकामनावां दीनी है। वे नौजवानां ऊं गुरुजनां रा प्रति श्रद्धा राखण अर वां रो मान करण री महान परंपरा ने और मज़बूत बणावण री अपील कीनी। विधानसभा अध्यक्ष वासुदेव देवनानी ई शिक्षक दिवस रे मौके शिक्षकां ऊं तनाव मुक्त, नशा मुक्त अर नारी रा प्रति मान रा संस्कारां री सीख दे र नौजवानां ने आदर्श जीवन रो गेलो बतावण री अपील कीनी।