विश्व आदिवासी दिवस रे मौके आज प्रदेश मांय ई न्यारा-न्यारा कार्यक्रम राख्यी ज्या। जैसलमेर मांय वाहन रैली निकाळी ज्यी। सांचौर मांय स्कूली विद्यार्थी आदिवासी संस्कृति री झांकियां पेश कीनी। बालोतरा मांय भील समाज री ओर ऊं शोभायात्रा निकाळी ज्यी, जिण मांय मोटी तादाद मांय आदिवासी लोग पारम्परिक पहराव मांय शिरकत कीनी। भीलवाड़ा ज़िला रा गंगापुर मांय आदिवासी समाज री ओर ऊं जुलूस निकाळी ज्यो।
डूंगरपुर ज़िला मांय आदिवासी संगठनां री ओर ऊं आदिवासी रीति-रिवाज रे मुजब कार्यक्रम राख्यी ज्या। शहर ऊं लेकर गांवां तांई आदिवासी पेहराव मांय रैलियां निकाळी ज्यी। कार्यक्रम मांय बांसवाड़ा रा सांसद राजकुमार रोत समेत मोटी तादाद मांय जनता सिरकत कीनी। झुंझुनूं रा मीणा हॉस्टल मांय विचार गोष्ठी अर पौधा रोपण रो कार्यक्रम राख्यी ज्यो। जयपुर रा जवाहर कला केन्द्र मांय आदिवासी महोत्सव राख्यो जा रह्यो है। दौसा जिला रा नांगल प्यारीवास मांय राख्यी ज्या आदिवासी महोत्सव मांय कृषि मंत्री डॉक्टर किरोड़ी लाल मीणा अर जनता रा केई नुमाइंदा मौजूद रह्या। कार्यक्रम पाछे खबरनवीसां सागे बातचीत करता थकां डॉ. किरोड़ी लाल मीणा सरकारी नौकरियां मांय आरक्षण रा बारा मांय लारला दिनां आया सुप्रीम कोर्ट रा फैसला रो स्वागत करता थकां कह्यो के ईं फैसला रा बारा मांय कुछ लोग गुमराह करण री कोशिश कर रह्या है। आदिवासी दिवस रे मौके केंद्रीय संचार ब्यूरो कोटा री ओर ऊं मीणा छात्रावास मांय संगोष्ठी राख्यी ज्यी अर छात्रावास परिसर मांय पौधा रोप र पर्यावरण री हिफाजत रो संकल्प करी ज्यो। केन्द्रीय संचार ब्यूरो डूंगरपुर री ओर ऊं वीरबाला कालीबाई राजकीय जनजाति बालिका छात्रावास मांय संगोष्ठी अर दूजी होड़ा राख्यी ज्यी अर जीतण वाळां ने ईनाम दे र नवाज़ी ज्या। जालोर जिला रा ओटवाला मांय राख्यी ज्या कार्यक्रम मांय विधानसभा रा मुख्य सचेतक जोगेश्वर गर्ग कह्यो के जनजाति समुदाय रा लोग वां री मेहनत अर काबिलियत रे पाण देश रो नाम रोशन कर रह्या है।