विधानसभा मांय पख अर विपख सदस्यां बीचे रार हाल ई चाल रही है। सोमवार ने आखा दिन हंगामा रे कारण दोपहरा पाछे 01ः00 बज्यां तांई सदन री कार्यवाही बार-बार टालणी पड़ी। कामकाज सरू व्हेतां ई 21 तारीख ऊं सदन मांय धरनो दे रह्या कांग्रेस रा विधायक वेल मांय जा र हंगामो करण लाग्या। लंच पाछे विपख रा नेता टीकाराम जूली अर कांग्रेस रा दूजा सदस्यां री ओर ऊं शुक्रवार रा वाकया माथे खेद जतायी ज्यो। हालांकि कुछ देर पछे कांग्रेस रा सदस्य सामाजिक न्याय मंत्री अविनाश गहलोत कानी ऊं पैली वाळी प्रधानमंत्री इन्दिरा गांधी रा बारा मांय करी ज्यी टिप्पणी सारू वां ऊं माफी मंगावण री मांग माथे अड़ ग्या। ईं पाछे कांग्रेस रा सदस्य सदन ऊं बाहर निकळ ग्या। वे विधानसभा भवन सामी प्रदर्शन ई कीनो। दूजी कानी दोपहरां री बगत इण ई मुद्दा माथे कांग्रेस रा कार्यकर्ता जयपुर मांय बाइस गोदाम कने प्रदर्शन कीनो, जिण माथे पुलिस ने ज़ोर अजमाइश करणी पडी। सदन मांय विपख रा नेता टीकाराम जूली खबरनवीसा सागे बातचीत करता थकां कह्या के रार खत्म करण सारू सामाजिक न्याय अर अधिकारिता मंत्री ने खेद जतावणो चाहिजे। दूजी कानी गृह राज्य मंत्री जवाहर सिंह बेढ़म खबरनवीसा सागे बातचीत करता थकां कह्यो के सरकार री पहल रे बावजूद विपख रा सदस्य सदन रो कामकाज चलावण मांय मदद नी कर रह्या है।