विधानसभा उपचुनाव सारू प्रदेश रा छह विधानसभा हलकां मांय आज ई पात्र मतदातावां कानी ऊं घर ऊं वोट दिया ज्या। सलूम्बर मांय दिव्यांग अर बुजुर्ग मतदातावां मांय घर बैठ्यां वोट देवण सारू उमाव निजर आयो। झुंझुनूं, चौरासी, देवली-उनियारा, रामगढ अर खींवसर मांय ई पात्र मतदाता घर ऊं वोट दीना। होम वोटिंग प्रक्रिया रो पैलो दौर 8 नवम्बर ने पूरो व्हेला। इण रो दूजो दौर 9 अर 10 नवम्बर ने व्हेला। दौसा मांय घर ऊं वोट देवण रो काम काल सरू व्हेला। दौसा मांय विधानसभा उपचुनाव ने ध्यान राखता थकां जिला कलेक्टर देवेन्द्र यादव अर एस.पी. रंजीता शर्मा लवाण हलका मांय मतदान केन्द्र रो दौरो कीनो अर अहलकारां ने जरूरी हुकम दीना। डूंगरपुर ज़िला रा चौरासी विधानसभा हलका मांय उपचुनाव रा सिलसिला मांय नियुक्त व्यय पर्यवेक्षक स्वप्निल शरद अर सामान्य पर्यवेक्षक क.े विवेकानंदन आज जिला स्तर रा एकीकृत नियंत्रण कक्ष अर एसबीपी कॉलेज रो दौरो कीनो। वे सियासी हलचल मांय सिरकत करण वाळा सरकारी कर्मचारियां रे खिलाफ़ करड़ी कार्रवाई रा हुकम दीना। सलूंबर मांय ई विधानसभा उपचुनाव री आचार संहिता रा उल्लंघन अर सियासी पार्टियां रो प्रचार करण रा आरोप मांय 17 सरकारी अध्यापकां ने एपीओ करण री कार्रवाई करी ज्यी है। ईं बीचे विधानसभा उप चुनाव मांय वोट देवण बाबत् जाग जगावण सारु स्वीप कार्यक्रम रा तहत सलूम्बर रा चावण्ड बस स्टैंड माथे कारीगर, मजूरां अर महिलावां ऊं वोट ज़रुर देवण री अरज करी ज्यी।