विधानसभा अध्यक्ष वासुदेव देवनानी सगळी सियासी पार्टिंयां रा नेतावां ऊं सदन तौर-तरीका ऊं चलावण मांय मदद करण री अपील कीनी है। वे बुधवार ने सगळी पार्टिंयां री मीटिंग मांय बोल रह्या हा। स्पीकर कह्यो के विधानसभा राज्य री आठ करोड़ जनता री नुमाइन्दगी करे है अर जनता रा नुमाइन्दां ने लोगां री उम्मीदां रे मुजब व्यवहार करणो चाहिजे। मीटिंग मांय मुख्यमंत्री भजनलाल शर्मा ई सिरकत कीनी। ईं पाछे वे विधानसभा रा नुवा परिवेश ने निरख्यो। मुख्यमंत्री विधानसभा मांय डिजिटलीकरण समेत दूजा नवाचारां री सराहवणा ई कीनी। ईं मौके विधानसभा अध्यक्ष वासुदेव देवनानी, विपख रा नेता टीकाराम जूली, संसदीय कार्यमंत्री जोगाराम पटेल, ऊर्जा राज्य मंत्री हीरालाल नागर, सरकारी मुख्य सचेतक जोगेश्वर गर्ग समेत न्यारी-न्यारी पार्टिंयां रा नेता मौजूद हा। मीटिंग पाछे खबरनवीसां सागे बातचीत करता थकां संसदीय कार्यमंत्री जोगाराम पटेल कह्यो के विपख जो मुद्दा पेश करेला, सरकार तथ्यां सागे वां रो जवाब देवेला। सदन मांय विपख रा नेता टीकाराम जूली कह्यो के सदन चलावण मांय विपख पूरी मदद करेला।