वित्त मंत्री निर्मला सीतारमण थावर ने संसद मांय माली साल 2025-26 रो बजट पेश कीनो। श्रीमती सीतारमण लगातार 8 वी दफ़ा बजट पेश कीनो। बजट ऐलाण रे मुजब 4 लाख रूप्या सालाना री आमदनी तांई कोई इन्कम-टैक्स नी लागेला। 4 ऊं 8 लाख रूप्या सालाना री आमदनी परां 5 फीसदी, 8 ऊं 12 लाख रूप्या री आमदनी तांई 10 फीसदी, 12 ऊं 16 लाख रूप्या सालाना री आमदनी तांई 15 फीसदी, 16 ऊं 20 लाख रूप्या तांई री आमदनी परां 20 फीसदी, 20 ऊं 24 लाख सालाना री आमदनी तांई 25 फीसदी अर 24 लाख रूप्या सालाना ऊं बत्ती आमदनी परां 30 फीसदी री रेट ऊं टैक्स देवणो व्हेला। वित्त मंत्री कह्यो के सगळी भांत री कर छूट रो फायदो लेवण पाछे 12 लाख रूप्या सालाना री आमदनी तांई कोई टैक्स नी देवणो व्हेला। बजट मांय नौकरी पेशा सारू मानक कटौती 50 हजार ऊं बधा र 75 हजार रूप्या सालाना करण रो प्रस्ताव करी ज्यो है, ज्यीं पाछे वां री 12 लाख 75 हजार रूप्या सालाना आमदनी तांई कोई इन्कम टैक्स नी लागेला। वित्तमंत्री एम.एस.एम.ई करोबारियां सारू कर्ज री सीमा पांच करोड़ ऊं बधा र 10 करोड़ रूप्या करण रो ऐलाण कीनो। बजट भाषण मांय श्रीमती सीतारमण कह्यो के उद्यम पोर्टल माथे पंजीकृत एम.एस.एम.ई. उद्यमां सारू पांच लाख रूप्या री सीमा वाळा खास क्रेडिट कार्ड चलाया जावेला। स्टार्टअप सारू कर्ज री सीमा 20 करोड़ रुप्या तांई करी जावेला। बजट मांय भारत ने खिलौना बणावण रो वैश्विक केंद्र बणावण री योजना चलावण रो ऐलाण ई करी ज्यो। ईं योजना ऊं ऊंची गुणवत्ता वाळा पर्यावरण अनुकूल खिलौना बणाया जावेला। बजट मांय खेती-बाड़ी रा हलका मांय देश रा कम उत्पादकता वाळां 100 ज़िलां मांय प्रधानमंत्री धनधान्य कृषि योजना चलावण रो ऐलाण करी ज्यो है। ईं योजना रा तहत साखां मांय पाणत रा सुबीता मांय सुधार कर्या जावेला अर लम्बी अर छोटी मियाद रा कर्ज मुहैया करावण ने आसान बणायो जावेला। इण ऊं एक करोड़ सत्तर लाख किसानां ने फायदो मिलेला। वित्त मंत्री कह्यो के अब किसान क्रेडिट कार्ड रे मार्फत पांच लाख रूप्या तांई रा कर्ज दिया जावेला। पैली आ सीमा तीन लाख रूप्या तांई ही। वित्त मंत्री बत्ती पैदावार देवण वाळा , कीटरोधी अर जलवायु अनुकूल बीज तैयार करण रा मकसद ऊं उच्च पैदावार बीज मिशन सरू करण रो ऐलाण कीनो। श्रीमती सीतारमण वां रा भाषण मांय गांवाई हलकां मांय खुशहाली बधावण सारू खास कार्यक्रम चलावण रो ऐलाण कीनो। इंर् रा तैत खेती-बाड़ी रा हलका मांय निवेश, तकनीक अर कौशल विकास रे जरिये गांवाई हलका री माली व्यवस्था ने मजबूत बणावण री कोशिश करी जावेला। बजट मांय 6 साल रा मिशन फोर आत्मनिर्भरता इन पल्सेस चलावण रो प्रस्ताव ई करी ज्यो। ई रा तैत किसानां ऊं तुअर, उड़द अर मसूर री दाळां री खरीदी माथे नेफेड अर एन.सी.सी.एफ. री ओर ऊं खास ध्यान दियो जावेला।
बजट मांय पहली दफ़ा खुद रो काम-धंधो सरू करण वाळा अनुसूचित जाति, जनजाति अर महिला वर्ग रा पांच लाख जणां ने आवता पांच साल मांय दो करोड़ रूप्या तांई रा कर्ज मुहैया करावण सारू नुवी योजना चलावण रो ऐलाण करी ज्यो। विद्यार्थियां मांय नुवी खोज करण अर विज्ञान री बेहतर जाणकारी ने बधावो देवण सारू सरकारी स्कूलां मांय आवता पांच साल मांय पचास हजार अटल टिंकरिंग लेब खोली जावेला। स्कूलां मांय देशी भाषावां मांय लिखी ज्यी किताबां डिजिटल रूप मांय मुहैया करावण सारू भारतीय भाषा पुस्तक योजना चलायी जावेला। मेक इन इंडिया रा तहत कौशल विकास सारू देश मांय पांच राष्ट्रीय केंद्र खोल्या जावेला। वित्त मंत्री एआई री शिक्षा सारू उत्कृष्टता केंद्र बणावण रो ऐलाण ई कीनो। गांवाई हलकां मांय सरकारी स्कूलां अर प्राथमिक स्वास्थ्य केन्द्रां सारू भारत नेट परियोजना रा तैत ब्रॉड बैण्ड कनेक्टिविटी मुहैया करायी जावेला। स्वास्थ्य रा हलका मांय सुबीता बधावण रा मकसद ऊं मेडिकल कॉलेजां मांय दस हजार और सीटां मुहैया करायी जावेला। बजट मांय सगळा ज़िला अस्पतालां मांय आवता तीन साल मांय डे-केयर-कैंसर सेंटर खोलण रो प्रस्ताव करी ज्यो। ईं रा तैत माली साल 2025-26 मांय दो सौ केन्द्र खोल्या जावेला। बजट मांय गिग कर्मचारियां सारू ई-श्रम पोर्टल माथे नाम मण्डावण अर वां रा पहचान पत्र बणावण सागे ई वां ने प्रधानमंत्री जन आरोग्य योजना रा तैत स्वास्थ्य सुबीता मुहैया करावण रो प्रावधान करी ज्यो। इण ऊं ऑनलाईन पोर्टल रे जरिये काम करण वाळा करीब एक करोड़ गिग कर्मचारियां ने फायदो मिलेला। गांवाई हलकां मांय हर घर तांई नळ रे जरिये पाणी पूगावण रा मकसद ऊं चलायी ज्या जल जीवन मिशन ने ई साल 2028 तांई बधावण रो ऐलाण करी ज्यो है। जनता ने हवाई सफ़र रो सुबीतो मुहैया करावण रा मकसद ऊं चलायी ज्यी उड़ान योजना रा तैत आवता दस साल मांय एक सौ बीस और शहरां ने जोड़्या जावेला। सैर सपाटा ने बधावो देवण सारू बजट मांय सैर सपाटा री पचास बेहतरीन ठौड़ा रो विकास करण रो प्रस्ताव ई करी ज्यो। वित्त मंत्री बजट भाषण मांय बीमा हलका सारू प्रत्यक्ष विदेश निवेश एफ.डी.आई. री सीमा 74 ऊं बधा र 100 फीसदी करण रो ऐलाण ई कीनो।
केन्द्रीय बजट मांय इण्डिया पोस्ट पैमेन्ट बैंक री सेवावां रो सुबीतो गांवाई हलकां मांय और बधावण रो प्रस्ताव ई करी ज्यो। बजट रा बारा मांय पख-विपख रा केई नेतावां री प्रतिक्रिया मिली है। गृह मंत्री अमित शाह कह्यो के ओ बजट मोदी सरकार री दूर री सोच रो ब्ल्यू प्रिंट है। मुख्यमंत्री भजनलाल शर्मा कह्यो के ओ सगळां रो ध्यान राखण वाळो ओ बजट न केवल मौजूदा दौर री सगळी जरूरतां री पूर्ति करे है बल्कि विकसित भारत री सोच सांची करण री दिशा मांय खास कदम है। राज्य रा ऊर्जा मंत्री हीरा लाल नागर बजट मांय इन्कम टैक्स छूट रा प्रावधान री सराहवणा करता थकां बजट ने प्रगतिशील बतायो। केंद्रीय मंत्री अर जोधपुर रा सांसद गजेन्द्र सिंह शेखावत बजट ने बेहतर जिन्दगी देवण वाळो बतायो। वे कह्यो के बजट नौजवानां ने खुद रे पाण ऊबा करण, किसानां री आमदनी बधावण, महिलावां ने मान देवण अर कम आमदनी वाळां ने बेहतर जिन्दगी देवण वाळो है। दूजी कानी विपख बजट री आलोचना करता थकां इण मांय मझला तबका री जनता अर नौजवानां सारू कोई प्रावधान नी करण रो आरोप माण्ड़्यो। प्रदेश कांग्रेस अध्यक्ष गोविन्द सिंह डोटासरा बजट ने निराश करण वाळो बताता थकां कह्यो के इण मांय हर तबका री अनदेखी करी ज्यी है। वे कह्यो के बजट मांय राजस्थान रो नाम तांई नी आयो अर ई.आर.सी.पी. ने राष्ट्रीय परियोजना बणावण रो ऐलाण नी करी ज्यो। कांग्रेस रा सांसद शशि थरूर कह्यो के बजट मांय बेरोजगारी अर नौजवानां ऊं जुड़्या मुद्दां माथे ध्यान नी दियो ज्यो। तृणमूल कांग्रेस रा सांसद अभिषेक बनर्जी कह्यो के बजट मांय मझला तबका री जनता सारू तांई है अर सरकार जनता ने गुमराह करण री कोशिश कर रही है।