वक्फ संशोधन बिल, 2025 माथे गुरूवार ने राज्यसभा मांय चर्चा व्हे रही है। अल्पसंख्यक कार्य मंत्री किरेन रिजिजू सदन मांय ओ बिल पेश करता थकां कह्यो के इण रो मकसद संपत्ति प्रबंधन मांय साफगोई सागे वक्फ बोर्डां अर स्थानीय अहलकारां बीचे तालमेल बधा र अर हितधारकां रा अधिकारां री हिफाजत कर र शासन मांय सुधार करणो है। केन्द्रीय मंत्री विपख ऊं ईं बिल री हिमायत करण री अपील कीनी। वे ज़ोर दे र कह्यो के ईं बिल रो मकसद वक्फ संपत्तियां रो बेहतर प्रबंधन तैय करणो है, न कि मुस्लिम समुदाय रा धार्मिक मामलां मांय दखल अंदाजी करणो। श्री रिजिजू कह्यो के बिल मांय मुसलमान महिलावां, खास तौर ऊं बेवा अर तलाकशुदा महिलावां रा माली अर सामाजिक हालात मांय सुधार करण री कोशिश करी ज्यी है। चर्चा मांय शिरकत करता थकां कांग्रेस रा सैयद नसीर हुसैन कह्यो के ओ बिल भरमावण वाळो है अर इण ने सांप्रदायिक ध्रुवीकरण रा मकसद ऊं लायी ज्यो है। श्री हुसैन ने बीच मांय टोकता थकां केंद्रीय गृह मंत्री अमित शाह कह्यो के विपख जनता ने गुमराह करण री कोशिश कर रह्यो है।