लोकसभा मांय वक्फ संशोधन बिल, 2025 माथे चर्चा चाल रही है। केंद्रीय अल्पसंख्यक मामलात् मंत्री किरेन रिजिजू ओ बिल पेश करता थकां कह्यो के ईं बिल रो मुस्लिम समुदाय री धार्मिक रीतियां ऊं कोई लेणो-देणो नी है अर केवल वक्फ बोर्डां ऊं जुड़ी सम्पत्तियां रा बारा मांय है। श्री रिजिजू कह्यो के वक्फ बोर्डां रो प्रबंधन राज्य सरकारां करेला। श्री रिजिजू कह्यो के सरकार वक्फ बोर्डां ने समावेशी अर धर्मनिरपेक्ष बणावण री मंशा राखे है। वे कह्यो के ओ बिल मस्जिदां रा प्रबंधन सारू नी है। अल्पसंख्यक मामलात् मंत्री कह्यो के संशोधन बिल मांय वक्फ बोर्ड मांय न्यारा-न्यारा मुस्लिम संप्रदायां, महिलावां, गैर-मुस्लिम अर दूजा लोगों री नुमाइंदगी व्हेला। श्री रिजिजू कह्यो के इण ने उम्मीद नाम दियो ज्यो है। श्री रिजिजू विपख माथे बिल रा बारा मांय जनता ने गुमराह करण रो आरोप मांड्यो। चर्चा री सरुआत करता थकां कांग्रेस रा गौरव गोगोई सरकार माथे ओ बिल ला र जनता ने गुमराह करण रो आरोप मांडता थकां कह्यो के ओ बिल संविधान रे खिलाफ़ है। श्री गोगोई कह्यो के मौजूदा कानून मांय बदलाव ऊं और परेशानियां पैदा व्हेला। इण ऊं पैली केंद्रीय गृह मंत्री अमित शाह कह्यो के ओ बिल संयुक्त संसदीय समिति कानी ऊं विगतवार चर्चा पाछे लायी ज्यो है अर मंत्रिमंडल इण ने मंजूरी दे दीनी है।