संसद रा दोन्यू सदनां री कार्यवाही सोमवार ने ई विपख रा सदस्यां रा हंगामा रे कारण केई दफा टाळणी पड़ी। शोर-शराबा बीचे ई लोकसभा मांय कार्मिक, लोक शिकायत अर पेंशन राज्य मंत्री डॉ. जितेंद्र सिंह लोक परीक्षा-अनुचित साधन निवारण संशोधन बिल 2026 पेश कीनो। पेपर लीक री रोकथाम सारू लायी ज्या ईं बिल मांय दोषियां ने दस साल तांई री कैद अर वां माथे दस करोड़ रुप्या तांई रो जुर्मानो लगावण सागे वां री संपत्ति जब्त करण रो प्रावधान है। ईं रे अलावा मामलां रो बेगो निपटारो तय करण सारू सगळा राज्यां अर केन्द्र रा राज वाळा प्रदेशां मांय खास फास्ट ट्रैक अदालतां खोली जावेला, जठे मामलां री रोजीना सुणवाई व्हेला। बिल पेश करती बगत विपख रा सदस्य नीट परीक्षा पेपर लीग रा मुद्दा माथे विरोध प्रदर्शन रे दौरान विद्यार्थियां रे खिलाफ कथित पुलिस कार्यवाही माथे चर्चा री मांग करता थकां हंगामो कीनो। ईं परां लोकसभा अध्यक्ष ओम बिरला सदन री कार्यवाही ठीक ढंग ऊं चलावण मांय मदद करण अर वां रो मान बणायो राखण री अरज कीनी। ध्यान जोग है के 20 जुलाई ऊं सरू व्ह्या पावस सत्र री कार्यवाही मांय पेपर लीक मुद्दा अर विद्यार्थियां रा आन्दोलन रा मामला ने ले र लगातार अड़चन आ रही है।