लोकसभा अध्यक्ष ओम बिरला कह्या के प्रकृति ने बचाबा मांय आदिवासी समाज रो महताऊ योगदान है। दीतवार ने विश्व आदिवासी दिवस माथे कोटा मांय राख्या एक कार्यक्रम मांय भाग लेबा रे पछे खबरनवीसा सूं बातचीत मांय वे कह्या के आदिवासियां रा हित मांय काम करबा खातर सरकार पूरी कोशिश कर री है। वां रा विकास खातर लगातार काम कर्या जा रह्या है। आदिवासी दिवस माथे राज्य मांय न्यारी-न्यारी ठोडां माथे कार्यक्रम राख्या गया। डूंगरपुर मांय व्ह्या कार्यक्रम मांय आदिवासी समाज रा लोग पारम्परिक वेशभूषा मांय गैर नृत्य रे सागे रिझावणी सांस्कृतिक प्रस्तुतियां दी। इण मौके आदिवासी महापुरूषा रा चित्रा माथे माला चढा र वां ने याद कर्यो गयो। पाली मांय भी आदिवासी दिवस पारम्परिक रूप सूं मनायो गयो। वठीने बालोतरा जिला मंाय काम कर रिया मीणा समाज रा कर्मचारी, अधिकारी, स्नेहमिलन कार्यक्रम राख र आदिवासी दिवस मनायो। दौसा जिला रा नांगल राजावतान मांय राख्या कार्यक्रम मांय कृषि मंत्री डाॅ. किरोडी लाल मीणा भाग लीना। बतायो जावे है के ओ दिन आदिवासी समाज री संस्कृति परम्परा, आनबान अर अधिकारां खातर एकजुटता अर आदिवासी गौरव रा तिंवार रा रूप मंाय मनायो जावे है। इण बरस री थीम आदिवासी पारम्परिक दाईयों का सम्मान-जीवन और स्वास्थ्य की सुरक्षा’’ राख्यी गयी है।