लोकसभा अध्यक्ष ओम बिरला आप रे संसदीय खेतर कोटा-बूंदी दौरे माथे है। श्री बिरला केई कार्यक्रमां मांय हिस्सो ले रिया है। आज वणा कोटा मांय शिक्षा महकमां रे कर्मचारियां री सहकारी सभा रे कार्यक्रम मांय शिरकत करी। इण मौके माथे श्री बिरला कह्यो के आज रे बगत तकनीकी संसाधन बढ्या है, पण शिक्षा रे खेतर मांय क्रांति शिक्षक ही ला सके है। नुवी पीढ़ी ने तैयार करणे मांय शिक्षक री महत्ती भूमिका होवे है। वणा कह्यो के केवल भौतिक संसाधनां सूं नागरिकां रो चरित्र निर्माण नही कर्यो जा सके है। लोकसभा अध्यक्ष कह्यो के सहकारिता आंदोलन दुनियाभर मांय बदलाव लाणे रो काम कर्यो है। इण रे माध्यम सूं लोगां रे जीवन मांय घणो बदलाव आयो है अर सूदखोरी सूं लोगां ने निजात मिली है।