रेल, सूचना प्राद्यौगिकी अर सूचना अर प्रसारण मंत्री अश्विनी वैष्णव आज जयपुर मांय प्रदेश भाजपा रा दफ़्तर मांय पार्टी रा जयपुर शहर रा कार्यकर्तावां सागे बातचीत कीनी। वे मुख्यमंत्री भजन लाल शर्मा सागे ई वां रा रेहवास माथे मुलाकात कीनी। ईं पाछे रेल मंत्री जयपुर रा गांधीनगर रेलवे टेशन माथे कर्या जा रह्या विकास रा कामां रो जायज़ो लीनो। ईं मौके खबरनवीयां सागे बात करता थकां वैष्णव कह्यो के देश मांय एक हजार 324 टेशनां ने ओजू विकसित कर्या जा रह्या है। वे कह्यो के सगळां टेसनां माथे टेसनां रा दोन्यू सिरां ने जोड़बा वाळा रूफ प्लाज़ा बणाया जावेला। मंत्री कह्यो के गांधीनगर देश रा वां अगाड़ी टेसनां मांय भेळो है जठे रूफ़ प्लाज़ा बणावण सारु गर्डर डालण रो काम पूरो व्हे ग्यो है। वे कह्यो के रूफ़ प्लाज़ा मांय भांत-भांत रा सुबीता मुहैया कराया जावेला। रेल मंत्री कोटा ऊं सवाईमाधोपुर बीचे लगायी ज्यी रेलवे लेणां री सुरक्षा प्रणाली कवच 4.0 रा बारा मांय ई जाणकारी दीनी। वे कह्यो के इण ऊं रेल हादसा रोकण मांय मदद मिलेला। मंत्री कह्यो के देश मांय साल 2030 तांई सगळी ठौड़ां कवच री व्यवस्था लगावणो तैय करी ज्यो है। मंत्री वैष्णव आज जयपुर ऊं सवाईमाधोपुर बीचे खास रेलगाड़ी मांय सफर कीनो। ईं पाछे वे सवाईमाधोपुर ऊं सुमेरगंज मंडी तांई रेल रा इंजन मांय बैठ र कवच सुरक्षा प्रणाली री जांच कीनी। रेल मंत्री इणने बेहतरीन सुरक्षा प्रणाली बतायी। वे गंभीर हादसां रा हालात मांय मुसाफिरां ने बेगा ऊं बेगा बोगियां ऊं बाहर निकाळबा ऊं जुड्या पायलट प्रोजेक्ट री जाणकारी हांसिल कीनी। उत्तर-पश्चिम रेलवे रा बांदीकुई, मेड़तारोड़, लालगढ़ अर उदयपुर टेशनां माथे ईं पायलट प्रोजेक्ट रा तहत खास टीमां लगायी ज्यी है। ईं पायलट प्रोजेक्ट सारू 3 करोड़ 40 लाख रूप्या मंजूर करी ज्या है।