रेलवे त्यौहारां रे मौके मुसाफ़िरां रा सुबीता सारु शुक्रवार ऊं एक सौ 64 खास गाड़ियां और चलावेला। रेलवे री आवता तीन दिन तांई 476 खास रेलगाडियां चलावण री योजना है। उत्तर रेलवे दिल्ली, हरियाणा, उत्तर प्रदेश, पंजाब, उत्तराखंड अर जम्मू-कश्मीर रा न्यारा-न्यारा टेशनां ऊं देश रा न्यारा-न्यारा हलकां सारु करीब 20 गाड़ियां चलावेला। आं मांय वाराणसी, प्रयाग, छपरा, गोरखपुर, दरभंगा, बरौनी अर होड़ा शामिल है। आकाशवाणी समाचार सागे खास बातचीत मांय उत्तर रेलवे रा मुख्य जनसंपर्क अधिकारी हिमांशु शेखर उपाध्याय बतायो के रेलवे टेसनां ऊं मुसाफिरां ने आराम ऊं बाहर निकाळबा सारू रेलवे सुरक्षाबल रा जवान अर स्वयंसेवक तैनात करी ज्या है। उत्तर-पश्चिम रेलवे री ओर ऊं ई त्यौहारां ने ध्यान राखता थकां केई खास रेलगाड़ियां चलायी जा रही है। ईं सागे ही टेशनां माथे भीड़ प्रबंधन सारू ही जरूरी प्रबंध करी ज्या है। जयपुर मंडल रा वरिष्ठ मंडल वाणिज्य प्रबंधक कृष्ण कुमार मीणा बतायो के रेलवे मुसाफिरां रा सुबीता सारू सगळा ज़रूरी जतन कीना है।