राष्ट्रीय सड़क सुरक्षा माह रे तैत प्रदेशभर मांय जागरुकता गतिविधियां जारी है। इण रे जरिये आम लोगां मांय यातायात अर सड़क सुरक्षा रा नियमां री पालना करबा खातर जाग जगाई जावेला। इण रे साथे ही सड़क हादसां मांय कमी लाबा री कोशिश करी जावेला। सोमवार ने अजमेर मांय यातायात पुलिस री कानी ऊं स्कूली टाबरां रे सागे रैली काढी गई। वठी ने पाली रा सोजत मांय गाड़ियां माथे रिफ्लेक्टर स्टीकर्स लगाया गया। वठी ने सवाईमाधोपुर मांय नेहरू युवा केन्द्र अर एनएसएस रा स्वयं सेवक भी यातायात पुलिस रे सागे मिलर सड़क सुरक्षा रो संदेश दे रिया है। ये वॉलियंटर्स सोमवार ने शहर रा खास-खास चौराहां माथे आम लोगां ने यातायात रा नियमां री जाणकारी दी। इण ई भांत झुंझुनूं मांय स्वंय सेवकां री टीम ड्राईवरां री समझाइश करी। इण रे सागे ही जनजागरुकता खातर विचार गोष्ठियां भी राखी जारी है। उपमुख्यमंत्री डॉ. प्रेमचंद बैरवा भी सोमवार ने झुंझुनूं दौरा माथे रिया। खबरनवीसां सूं बातचीत मांय वे कया के सड़क सुरक्षा किणी भी एक महकमा री बजाय सागळा री सामुहिक जिम्मेदारी है।