राष्ट्रीय युवा दिवस रे मौके दीतवार ने जयपुर रा सवाईमानसिंह स्टेडियम मांय राज्य थर रो युवा महोत्सव व्ह्यो। महोत्सव मांय बोलता मुख्यमंत्री भजन लाल शर्मा कह्यो के विवेकानन्द नौजवानां सारू सब ऊं मोटा प्रेरणा स्त्रोत है। वणा कह्यो के जिण मिनख रा मन मांय दृढ संकल्प शक्ति होवे है तो तैय है के आप रा सपना ने साकार करे है। मुख्यमंत्री कह्यो के प्रधानमंत्री नरेन्द्र मोदी री अगुवाई मांय राज्य सरकार नौजवान महिला, किसान अर गरीब री भलाई सारू समर्पित व्हे र काम कर री है। ई मौके मुख्यमंत्री न्यारी-न्यारी श्रेणियां मांय ठांवो काम करण वाळां 11 नौजवानां ने यूथ आइकन अवॉर्ड्स दिया। मुख्यमंत्री युवा साथी केन्द्र रो वर्चुअल उद्घाटन ई कर्यो। कार्यक्रम मांय युवा मामलां अर खेल मंत्री कर्नल राज्यवर्धन राठौड़ मौजूद रह्या। वणा कह्यो के आपा रा देश अर प्रदेश रो युवां आप रो लगस हासिल करण सारू किण ई हद ऊं बध्यो नी है। जळसा मांय राज्य मंत्री के.के. विश्नोई अर सचिव नीरज के. पवन समेत केई ओेहदादार मौजूद रह्या। वठे ई प्रदेश रा न्यारा-न्यारा शहरा अर कस्बां मांय स्वामी विवेकानन्द ने सिरधा रे साथे याद करी ज्या। अलवर मांय अशोक सर्किल माथे विवेकानन्द मूरत माथे पुष्प अर्पण कार्यक्रम व्ह्यो। बारां, चूरू समेत केई ज़िला मांय स्वामी विवेकानन्द जयंती माथे न्यारा-न्यारा कार्यक्रम व्ह्या।