चिकित्सा अर स्वास्थ्य मंत्री गजेन्द्र सिंह खींवसर आज नागौर ज़िला मांय बच्चां अर किशोर किशोरियां ने पेट रा कीड़ा मारण री गोळी एल्बेंडाज़ोल खिला र री सरूआत कीनी। ई मौके वे कह्यो के बच्चां रा स्वास्थ्य रो ध्यान राखणो घणो ज़रूरी है। खींवसर कह्यो के बच्चां रे पेट रा कीड़ा खत्म करण सारू सरकार गांव-ढाणी तांई कृमि मुक्ति अभियान चला रही है। वे कह्यो के बच्चां ने छह महीना मांय एक दफ़ा कीड़ा मारण री दवा जरूर खिलावणी चाहिजे। प्रदेश रा सगळा अस्पतालां, स्कूल-कॉलेजां, मदरसां अर आंगनबाड़ी केन्द्रां माथे अ गोळयां मुफ्त दीरीजी। सवाईमाधोपुर ज़िलां मांय मुख्य चिकित्सा अर स्वास्थ्य अधिकारी डॉ. धर्मसिंह मीना मानटाउन बालिका स्कूल मांय टाबरियां ने एल्बेंडाजोल री गोळी खिला र ज़िला स्तर रा कार्यक्रम री सरुआत कीनी। झुंझुनूं रा स्कूल-कॉलेजां मांय ई विद्यार्थियां ने अ गोळयां दीरीजी। बालोतरा रा जिला अस्पताल, आंगनबाड़ी केंद्रां अर स्कूलां मांय ई एल्बेंडाजोल री गोळयां दीरीजी। राष्ट्रीय कृमि मुक्ति दिवस रे मौके भीलवाड़ा री गुलमंडी स्कूल मांय मुख्य चिकित्सा अर स्वास्थ्य अधिकारी डॉक्टर चेतेंद्र पुरी गोस्वामी विद्यार्थियां ने एल्बेंडाज़ोल री गोळयां खिला र कार्यक्रम री सरूआत कीनी। जैसलमेर मांय ई पेट रा कीड़ा मारण री दवाई एल्बेंडाजोल खिलायी ज्यी। झालावाड़ मांय जिला कलक्टर अजय सिंह राठौड़ मंगलपुरा री लड़कियां री सीनियर सैकेण्डरी स्कूल मांय टाबरियां ने आ गोळी खिला र कार्यक्रम री सरूआत कीनी। अलवर मांय ई बच्चां ने पेट रा कीड़ा मारण री गोळी खिलायी ज्यी। आज गोळी नी खा सक्या बच्चां ने आ गोळी देवण सारू 17 अगस्त ने मॉपअप दिवस मनायो जावेला।