लौह पुरूष सरदार वल्लभ भाई पटेल री जयंती रे मौके मनाया जावण वाळा राष्ट्रीय एकता दिवस रा सिलसिला मांय राज्य मांय मंगलवार ने ‘रन फॉर यूनिटी‘ राख्यी ज्यी। मुख्यमंत्री भजनलाल शर्मा जयपुर मांय अमर जवान ज्योति ऊं ‘रन फॉर यूनिटी-एक भारत, श्रेष्ठ भारत‘ मैराथन दौड़ ने हरी झण्डी बता र रवाना कीनी। ईं मौके मौजूद लोगां ने वे राष्ट्रीय एकता दिवस री शपथ दिरायी। मुख्यमंत्री कह्यो के आज़ादी पाछे सरदार पटेल कानी ऊं मजबूती ऊं करी ज्यो देश रो एको नुवी पीढ़ी ने सीख देवे है। ईं मौके खेल मंत्री कर्नल राज्यवर्धन राठौड़ कह्यो के ‘रन फॉर यूनिटी‘ फिट इंडिया रो संदेश देवे है। प्रदेश रा न्यारा-न्यारा ज़िला मांय ई एकता दौड़ राख्यी ज्यी। झालावाड़ मांय गढ़ परिसर ऊं अतिरिक्त जिला कलेक्टर री अगुवाई मांय रन फोर यूनिटी दौड़ राख्यी ज्यी। ब्यावर मांय जिला प्रशासन अर पुलिस री ओर ऊं कलेक्ट्रेट परिसर ऊं चांद गेट तांई रैली निकाळी ज्यी। जयपुर मांय जिला कलेक्ट्रेट रा पार्क मांय शपथ रो कार्यक्रम राख्यी ज्यो। पुलिस महानिदेशक उत्कल रंजन साहू पुलिस मुख्यालय मांय पुलिस रा अहलकारां अर कर्मचारियां ने देश रा एका, अखंडता अर हिफ़ाजत री शपथ दिरायी। भीलवाड़ा मांय जिला कलेक्टर रा दफ्तर मांय देश रा एका सारू प्रतिबद्धता जतायी ज्यी। जालोर मांय हनुमानशाला स्कूल ऊं शाह पूंजाजी गेनाजी स्टेडियम तांई रन फॉर यूनिटी दौड़ राख्यी ज्यी।