राष्ट्रपिता महात्मा गांधी अर पेली आळा प्रधानमंत्री लाल बहादुर शास्त्री री जयंती माथे बुधवार ने वां ने सिरधापूर्वक याद कर्यो जा रह्यो है। इण मौके माथे परदेशभर मांय सर्वधर्म प्रार्थना सभावां राखीजी। राज्यपाल हरिभाऊ किसनराव बागड़े अर मुख्यमंत्री भजनलाल शर्मा जयपुर मांय जवाहर लाल नेहरू मार्ग स्थित गांधी सर्किल माथे राष्ट्रपिता महात्मा गांधी री मूर्ति माथे पुष्प अर्पित कर र वांने सिरधाजंलि दी। इण सूं पेल्या राज्यपाल राजभवन मांय महात्मा गांधी अर शास्त्री जी ने माळा चढा र सिरधाजंलि दी। मुख्यमंत्री शासन सचिवालय मांय महात्मा गांधी अर लाल बहादुर शास्त्री री जयंती माथे पुष्प अर्पित कर र वांने सिरधांजलि दी। पैल्या आळा मुख्यमंत्री अशोक गहलोत राष्ट्रपिता महात्मा गांधी अर पूर्व प्रधानमंत्री लाल बहादुर शास्त्री ने नमन करता व्ह्या वांने सिरधाजंलि दी। गांधी जयंती रे मौके माथे बुधवार सूं जयपुर रा सेन्ट्रल पार्क मांय थापित गांधी दर्शन म्युजियम री सरूआत व्हे ग्यी। पर्यटन कला अर संस्कृति महकमा रा शासन सचिव रवि जैन बतायो के पेले दिन बुधवार ने एक हजार सूं बत्ती पढेसरी गांधी वाटिका न देख्यो अर वाणी जीवन यात्रा ने जाण्यो। वणां कह्यो के गांधी वाटिका जयपुर मांय एक नुवे पर्यटन केन्द्र रे रूप मांय उभरेली। झुन्झुनू मांय गांधी पार्क मांय जिला प्रशासन, स्काउट गाइड अर न्यारा-न्यारा संस्थानां री कानी सूं सर्वधर्म प्रार्थना सभा राखीजी। वठीने डीग मांय गांधी जयंती अर शास्त्री जी रे जन्म दिन रे मौके माथे किशन लाल जोशी राजकीय उच्च माध्यमिक विद्यालय मांय श्रद्धाजंलि सभा राखीजी। वठीने बापू रा जीवन सूं जुड्या प्रसंगा न लेर प्रश्नोत्तरी कार्यक्रम भी राख्या गया। ब्यावर मांय चांग गेट थापित बापू री मूर्ति माथे जिला प्रशासन सूं जुड्या अहलकार, जनप्रतिनिधि अर आमजन पुष्पाजंलि अर्पित करी अर इण मौके माथे मौजूद लोग ब्यावर ने साफ बणायो राखण रो संकल्प लियो। टोंक जिला मांय भी न्यारी-न्यारी जगावां माथे प्रार्थना सभा अर सिरधाजंलि सभावां रो आयोजन व्ह्यो। शाहपुरा मांय गांधी जयंती स्वच्छ भारत दिवस रे रूप मांय मनायी ज्यी। बाड़मेर मांय अहिंसा चौराहा माथे जिला स्तरीय कार्यक्रम मांय प्रार्थना सभा रे आयोजन रे पाछे मौजूद लोग महात्मा गांधी अर लाल बहादुर शास्त्री ने सिरधासुमन अर्पित कर्या।