प्रदेश मांय पंचायतां अर स्थानीय निकायां रा चुनाव रो काम 15 नवम्बर तांई पूरो कर लियो जावेला। ईं बारा मांय सोमवार ने राज्य सरकार री ओर ऊं राजस्थान हाईकोर्ट मांय हलफनामो पेश करी ज्यो। ईं पाछे गिर्राज सिंह देवंदा अर संयम लोढ़ा री अर्जी माथे सुणवाई करता थकां हाईकोर्ट रा कार्यवाहक मुख्य न्यायाधीश न्यायमूर्ति संजीव प्रकाश शर्मा अर न्यायमूर्ति संजीत पुरोहित री खंडपीठ कह्यो के ईं मियाद पाछे सरकार ने चुनाव करावण सारू और बगत नी दियो जावेला। राज्य सरकार री ओर ऊं महाधिवक्ता राजेन्द्र प्रसाद शपथ पत्र अदालत सामी पेश कीनो। महाधिवक्ता कह्यो के 5 अगस्त तांई ओ.बी.सी. आयोग री रपट पेश कर दी जावेला। वे बतायो के ईं पाछे राज्य निर्वाचन आयोग री ओर ऊं 17 अगस्त ने निकाय चुनाव री अधिसूचना जारी करी जावेला अर 20 सितम्बर तांई चुनाव करा लिया जावेला। पंचायत चुनाव री अधिसूचना 23 सितम्बर ने जारी करी जावेला अर 15 नवम्बर तांई पंचायत चुनाव रो काम पूरो कर लियो जावेला।