राज्य सरकार गुरूवार ने विधानसभा मांय साफ़ कीनो सरकार री ओर ऊं कृषि मंत्री किरोड़ी लाल मीणा रो फोन टेप नी करायी ज्यो। विपख रा सदस्यां री मांग परां विधानसभा अध्यक्ष आज सरकार री ओर ऊं ईं मामला मांय जवाब देवण रो टेम तैय कीनो। गृह राज्य मंत्री जवाहर सिंह बेढ़म सरकार री ओर ऊं जवाब देता थकां कह्यो के कानून व्यवस्था ऊं जुड़्या मुद्दा या राज्य री हिफ़ाज़त सारु ज़रुरी व्हेवण री सूरत मांय गृह विभाग रा अतिरिक्त मुख्य सचिव किण ई रा फोन री निगराणी राखण री मंजूरी दे सके है। वे कह्यो के मुख्य सचिव री सदारत वाळी समिति इण माथे ओजू विचार करे है जिण री मीटिंग महीना मांय दो दफ़ा व्हे है। ईं माथे सदन मांय विपख रा नेता टीकाराम जूली कह्यो के श्री मीणा जिम्मेदार ओहदादार है अर गर सरकार वां रा फोन टेप नी करायो है तो ईं बारा मांय दिया ज्या बयान सारु सरकार ने डॉ. किरोड़ी लाल मीणा रे खिलाफ़ कार्रवाई करणी चाहिजे। विपख रा सदस्य मंत्री डॉ. मीणा रे खिलाफ़ कार्रवाई करण री मांग करता थकां सदन ऊं बाहर निकळ ग्या।