राज्य सरकार वां रा कर्मचारियां अर पेंशन लेवण वाळां रा मंहगाई भत्ता मांय दो फीसदी री बधोतरी कीनी है। मुख्यमंत्री भजनलाल शर्मा मंगलवार ने वित्त विभाग रा इण ऊं जुड़्या प्रस्ताव ने मंजूरी दे दीनी। ईं फैसला पाछे राज्य कर्मचारियां रो महंगाई भत्तो अब 53 फीसदी री बजाए 55 फीसदी व्हे ग्यो है। सरकार रा ईं फैसला ऊं प्रदेश रा आठ लाख कर्मचारियां अर पेंशन लेवण वाळा चार लाख चाळीस हजार जणां ने फायदो मिलेला। पंचायत समिति अर जिला परिषद रा कर्मचारियां ने ई ओ फायदो मिलेला। मंहगाई भत्ता मांय आ बधोतरी एक जनवरी 2025 ऊं मानी जावेला। मंहगाई भत्ता री एक जनवरी ऊं तीन महीना री रकम कर्मचारियां रा पी.एफ़. खाता मांय जमा करायी जावेला, जद के पेंशन लेवण वाळां ने मंहगाई राहत रो नकद चुकारो कर्यो जावेला। ईं फैसला ऊं राज्य सरकार माथे करीब आठ सौ बीस करोड़ रुप्या रो सालाना बोझ पड़ेला।