राज्य री मौजूदा सरकार रा कामकाज रो एक साल पूरो व्हेवण रा सिलसिला मांय गुरूवार ऊं 15 दिसम्बर तांई न्यारा-न्यारा कार्यक्रम राख्या जावेला। जयपुर समेत न्यारी-न्यारी ठौड़ां गुरूवार संवारे रन फॉर विकसित राजस्थान व्हेला। जोधपुर मांय गुरूवार ने मुख्यमंत्री रोजगार उत्सव अर युवा सम्मेलन राख्यो जावेला। मुख्यमंत्री भजन लाल शर्मा चिकित्सा मंत्री गजेन्द्र सिंह खींवसर सागे ईं रो उद्घाटन करेला। 13 दिसम्बर ने किसान सम्मेलन राख्या जावेला। भजनलाल सरकार री पहली वर्षगांठ रे मौके सरकार री ओर ऊं टाबरियां अर महिलावां रा भला ऊं जुड़ी  न्यारी-न्यारी योजनावां सरू करी जावेला। 14 दिसम्बर ने महिला सम्मेलन व्हेला। 15 दिसम्बर ने सेवा शिविर अर खूनदान शिविर समेत भांत-भांत रा कार्यक्रम राख्या जावेला। भजनलाल सरकार री पहली वर्षगांठ रे मौके सरकारी महकमां री ओर ऊं आयोजन व्हेला। जयपुर विकास प्राधिकरण री ओर ऊं कालवाड़ रोड़ परां नारी का बास मांय पैली वाळा प्रधानमंत्री अटल बिहारी वाजपेयी रा नाम ऊं अटल विहार योजना रा तैत 284 प्लॉट काट्या जावेला। सूचना अर जनसम्पर्क विभाग री ओर ऊं ज़िलां मांय विकास प्रदर्शनियां लगाई जावेला। सलूंबर मांय गुरूवार ने रन फॉर विकसित राजस्थान, युवा सम्मेलन, रोजगार उत्सव, जिला स्तर री प्रदर्शनी, जिला दर्शन पुस्तिका रो विमोचन अर पंच गौरव री सरुआत करी जावेला। 13 दिसंबर ने किसान सम्मेलन, 14 दिसंबर ने महिला सम्मेलन अर अंत्योदय सेवा शिविर राख्या जावेला।