राज्य रा 7 विधानसभा हलकां मांय 13 नवंबर ने व्हेवण वाळा उप-चुणाव मांय 69 उम्मीदवार चुणाव मैदान मांय है। सब ऊं बत्ता 12-12 उम्मीदवार दौसा अर खींवसर विधानसभा हलकां मांय है। ईं रे अलावा झुंझुनू मांय 11, रामगढ़ अर चौरासी मांय 10-10, देवली-उनियारां मांय 8 अर सलूबंर मांय 6 उम्मीदवार चुणाव मैदान मांय है। आं मांय दस महिला उम्मीदवार है। सब ऊं बत्ती 3 महिला उम्मीदवार सलूबंर विधानसभा हलका मांय है। ईं सागे गई अनुसूचित जाति वर्ग रा सात अर अनुसूचित जनजाति वर्ग रा 23 उम्मीदवार चुणाव लड रह्या है। उप चुणाव सारु भरी ज्या 118 पर्चां मांय ऊं 91 मंजूर करी ज्या, 11 नामपाना खारिज कर दिया ज्या जद के 16 उम्मीदवार नाम पाछा ले लीना। आज नाम पाछा लेवण री आखिरी तारीख ही। दौसा मांय 5, देवली-उनियारा अर झुंझुनू मांय 3-3, चौरासी अर खींवसर मांय 2-2 अर रामगढ़ मांय 1 उम्मीदवार नाम पाछो ले लीनो। सात ई विधानसभा हलकां मांय उप चुणाव रे दौरान स्वतंत्र, निष्पक्ष अर बिना डर्या वोट देवणो तैय करण सारू 1 हजार 938 मतदान केन्द्रां मांय ऊं 1 हजार 122 केन्द्रां माथे वोट देवण री प्रक्रिया री लाइव वेबकास्टिंग करी जावेला। आं हलकां मांय 735 मतदान केन्द्रां री संवेदनशील मतदान केन्द्र रा तौर ऊं पिछाण करी ज्यी है। ईं बीच निर्वाचन विभाग उड़न दस्तां अर दूजी निगरानी टीमां सागे आबकारी अर परिवहन विभाग समेत न्यारी-न्यारी एजेंसियां ने गैर-कानूनी नकदी, शराब अर दूजा मुफ्त सामान बांटण ऊं रोकण सारू कार्यवाही तेज करण रा हुकम दीना है। ईं बीचे पुलिस प्रशासन ई़ उप-चुणाव ऊं जुड़ी तैयारियां मांय लाग्योड़ो है। डूंगरपुर ज़िला रा चौरासी विधानसभा हलका मांय उप-चुणाव ने ध्यान राखता थकां पुलिस अर सीआरपीएफ रा जवान आज चौरासी विधानसभा हलका रा न्यारा-न्यारा गांवां मांय फ्लेग मार्च निकाळ्यो। ईं दौरान जनता ऊं बिना डर्यां, शांति सागे वोट देवण री अपील कीनी। दूजी कानी उपचुनाव वाळा हलकां मांय वोट देवण रो प्रतिशत बधावण सारू जाग जगावण बाबत् न्यारा-न्यारा कार्यक्रम राख्या जा रह्या है। टोंक मांय आज महिलावां री ओर ऊं जागरुकता रैली अर कलश यात्रा रे मार्फत वोट जरूर देवण रो संदेश दियो ज्यो।
000