राज्य रा सात विधानसभा हलकां झुंझुनू, रामगढ़, दौसा, देवली-उनियारा, खींवसर, सलूम्बर और चौरासी मांय उपचुनाव सारू पड़्या वोटां री गिणती 23 नवम्बर ने करी जावेला। मुख्य निर्वाचन अधिकारी नवीन महाजन बतायो के वोटां री गिणती री जरूरी तैयारियां पूरी कर लीरीजी है। संवारे आठ बज्यां सरू व्हेवण वाळी गिणती सारू 98 टेबल माथे 141 राउंड मांय गिणती करी जावेला। सब ऊं पैली पोस्टल बैलेट रे मार्फत डाली ज्या वोटां री गिणती करी जावेला, ज्यीं सारू 39 टेबल लगायी जावेला। गिणती री ठोड़ां सीसीटीवी कवरेज अर वीडियोग्राफी री व्यवस्था करीजी है। मीडिया सेंटर मांय मोटी टी.वी. स्क्रीन माथे मतगणना रा रुझान अर नतीजां री जाणकारी दी जावेला। ईं सागे ई मुख्य निर्वाचन अधिकारी रा दफ्तर री वेबसाइट अर निर्वाचन आयोग रा मोबाइल एप ’वोटर हेल्पलाइन’ माथे ई गिणती रा रूझान अर नतीजां री जाणकारी करी जा सकेला। टोंक जिला रा देवली-उनियारा विधानसभा हलका मांय वोटां री गिणती री तैयारियां रो जायजो लेवण सारू ज़िला निर्वाचन अधिकारी डॉ. सौम्या झा राजकीय पी.जी. कॉलेज रो दौरो कीनो। वे न्यारी-न्यारी व्यवस्थावां रो जायजो ले र अहलकारां ने जरूरी हुकम दीना