राज्य रा घणखर हलकां मांय आवता 4-5 दिन मौसम सूखो रेहवण रा आसार है, हालांकि कोटा, अजमेर, जयपुर, भरतपुर अर बीकानेर संभाग रा कुछ हलकां मांय आवता दो-तीन दिन घणी धुंअर रेहवण री संभावना है। मौसम केन्द्र जयपुर रे मुजब कोहरा रे कारण कठे-कठे दिन री बगत पारो 2 ऊं 4 डिग्री सेल्सियस तांई उतर सके है। ईं बीचे, राज्य मांय सब ऊं कम 3 दशमलव 7 डिग्री सैल्सियस न्यूनतम तापमान नागौर मांय दर्ज करी ज्यो। म्हाणा खबरनवीस बतायो के ज़ोरदार ठारी ऊं जिन्दगी माथे असर पड़ रह्यो है। फतेहपुर शेखावाटी मांय 5 दशमलव 4, अलवर मांय 5 दशमलव 8, अजमेर मांय 6 दशमलव 2, सीकर अर जैसलमेर मांय 6 दशमलव 7 अर राजधानी जयपुर मांय न्यूनतम तापमान 10 दशमलव 6 डिग्री सैल्सियस दर्ज करी ज्यो।