राज्य रा केई हलकां मांय सोमवार ने ई बिरखा व्ही। पाली जिला रा नाना भीमाणा, बेड़ा अर भाटूण्ड गाँवां मांय तेज हवा सागे बारिश व्ही। जालौर जिला रा जालौर अर भीनमाल मांय ई दोपहरां पाछे बायरो बाजण सागे व्ही बिरखा ऊं नीचला हलकां मांय पाणी भर ग्यो। भरतपुर मांय ई दोपहरां पाछे बरसात व्हेवण सागे कठे-कठे ओला पड़बा रा समाचार है। चित्तौड़गढ़, उदयपुर, बालोतरा अर चूरु मांय ई बिरखा रा समाचार है। बाड़मेर ज़िला रा जालीपा, चूली, भादरेश, बिशाला, नांद, कपूरड़ी, बोथिया अर भाडखा समेत आरे-सारे रा गांवां मांय तेज़ बायरो बाजण सागे पाणी बरस्यो, जिण ऊं खेतां मांय कट्योड़ी साखां ने नुकसान व्ह्यो है। इण ऊं पैली काल रात सेड़वा हलका रा केई गांवां मांय बरसात व्हेवण ऊं साखां ने नुकसाण व्ह्यो। सांचोर मांय ई काल मोड़ी रात व्ही बिरखा ऊं साखां ने नुकसाण री शंका है। ज़िला रा काश्तकार कलेक्टर ने पानड़ी सूंप र साखां री खास गिरदावरी करावण री मांग कीनी है।